49 ёшли Голливуд юлдузи Анжелина Жоли Deadline нашри журналистига берган интервьюсида опера хонандаси Мария Каллас образини яратган янги фильм ва унинг ҳаётига таъсири ҳақида маълумот берди.
“Мария” номли биографик фильм ҳақидаги суҳбатда Жоли бундай роллар ҳаётда бир марта берилишини алоҳида таъкидлаб ўтди. Шунингдек, актриса режиссёр Пабло Ларраин билан жуда узоқ вақтдан бери ишлашни истагани ва бу мақсади амалга ошганидан мамнун эканини билдирди.
“Фильмдаги Мария образи мени шахс сифатида ўзгартириб юборди. Фильм менинг ички муаммоларимни даволашга ёрдам берди”, деди “Оскар” мукофоти совриндори.
Суратга тушишга тайёргарлик кўриш учун Жоли мусиқа илмини ҳамда Калласнинг маҳорат дарслари битилган китобларни ўрганиб чиқди.
“Бор овоз ва барча ички ҳис-туйғуларингиз билан қўшиқ куйлаш учун нафасни ушлаб қолмаслик керак. Бундай вақтда сиз асабларингизни жиловлашингиз шарт эмас, балки бор овозингиз билан эмоцияларни, дилдаги оғриқларни ташқарига чиқариб юборишингиз керак”, деди Жоли.
Тўғри вокал техникаси, италян тили, опера айтиш санъати, суратга олишда қадни қандай тутиш ва нафас олиш қоидаларини ўрганиш, бир сўз билан айтганда, турли мураббийлардан тинимсиз дарс олиш Анжелина учун осон кечмади.
“Мария” фильми Чили давлатидан бўлган режиссёр Пабло Ларраиннинг биографик драмаси бўлиб, унда 20-асрнинг энг буюк опера хонандаларидан бири Мария Калласнинг ҳаёти ҳақида ҳикоя қилинади. Фильмдаги воқеалар 1970 йилларда Парижда, Каллас карьерасининг сўнгги йилларида бўлиб ўтади. Унинг премьераси 2024 йил август ойида Венеция кинофестивалида бўлиб ўтди.
Изоҳ (0)