Биринчи хонимнинг мақоми ҳар қандай аёлни машҳур қилиши мумкин, ҳатто унинг барча шахсий ва касбий ютуқлари “муваффақиятли никоҳ” нуқтасида якунланган бўлса ҳам. Машҳур қўшиқчи, актриса, раққоса ва моделлардан қайси бири ўз мамлакатининг биринчи хоними бўлиш шарафини қўлга киритгани ва эрлари ҳокимият тепасига келганидан кейин уларнинг карьерасига нима бўлгани ҳақида маълумот берамиз.
Карла Бруни-Саркози
Николя Саркозининг учинчи рафиқаси модел бўлган. Унинг кийиниш услуби ва гардеробидаги либослар сиёсатга модани олиб келган деса ҳам хато бўлмайди. Кийиниши сабаб уни Жаклин Кеннедига қиёслашади. Мусиқачилар оиласида дунёга келган Бруни вояга етганида ижод йўлидан кетишга қарор қилган. Мактабни битирганидан кейин архитектор бўлишни режалаштирган. Аммо моделлик карьерасини бошлаб юборган, City Мodels билан шартнома имзолаганида эндигина 19 ёшга тўлган эди.
Муваффақиятли лойиҳа ва ҳамкорликлар унинг машҳур бўлишига сабаб бўлган. Ҳали танилиб улгурмасидан мода оламининг титанлари ҳисобланган Dior, Givenchy, Chanel, Yves Saint-LAurent ва бошқа брендлар билан ҳамкорлик қилган. 90 йиллардаги машҳур моделлар ҳақида гап кетганида Карланинг исмини тилга олмасдан илож йўқ.
Аммо Карла фақатгина моделлик билан чекланмаган, у ижод қилиш, альбом ёзиш, қисқа қилиб айтганда, мусиқий карьерасини ҳам маромига етказган. Альбом тақдим қилган, мукофотларни қўлга киритган собиқ биринчи хоним айни вақтда ҳам мусиқа билан шуғулланиб туради. Қолаверса, у Елисей саройида яшаган вақтида ҳам ижодни ташлаб қўймаган. Турмуш ўртоғи президент бўлганининг биринчи йилидаёқ Comme si de rien nъétait альбомини тақдим қилган. Альбом сотувидан тушган маблағ эса хайрия ишларига сарфланган. 2011 йилда эса у режиссёр Вуди Алленнинг фильмида суратга тушишга ҳам муваффақ бўлган. Умуман олганда, Карла турмуш ўртоғидан қолишмайдиган даражада машҳур. Айни вақтда ҳам мавқейини ушлаб туришга ҳаракат қилади ва мусиқий карьерасини давом эттириб келади.
Мелания Трамп
Дональд Трампнинг учинчи рафиқаси Мелания коммунистик мамлакатда дунёга келган ягона биринчи хоним саналади. У Люблянада дунёга келиб, модел сифатида карьера қилиш учун у ерни тарк этган. У болалигида Словениядаги болалар мода чиқишида иштирок этган, 16 ёшида эса илк марта профессионал фотосессияда ўзини синаб кўрган.
У Карла Бруни сингари машҳур бўлмаган бўлса ҳам мода оламида ўзига яраша ном қозонишга муваффақ бўлган: моделлик агентлари билан шартнома тузиб, мода чиқишлари, журнал муқоваси учун суратлар ҳатто гўзаллик танловида иштирок этган. Трампнинг дўсти Паоло Замполли уни пайқаб, Нью-Йоркда модел сифатида фаолият юритишни таклиф қилмаганида, АҚШга кўчиб бориш унинг хаёлининг кўчасига ҳам келмаган бўларди. Шу баҳона бўлиб Трамп ва Мелания танишиб қолади.
Шундоқ ҳам чиройли ва латофатли бўлган Меланиянинг ишлари Трамп билан танишувидан кейин янада юришиб кетади. Модель сифатида карьераси гуллаб-яшнайди, реклама агентларидан таклифлар келиб туша бошлайди. Кейинроқ Мелания косметик брендга, заргарлик буюмлари коллекциясига асос солади. Хуллас, Оқ уйнинг бекасига айлангунига қадар ҳам Мелания ўзига яраша машҳур бўлган.
Софи Грегуар-Трюдо
Замонамизнинг энг келишган ва машҳур сиёсатчиларидан бири бўлган Канада бош вазири Жастин Трюдонинг рафиқаси Софи номини аввал бутун дунё аҳолиси бўлмаса ҳам Канаданинг Квебек провинциясидаги ҳар иккинчи одам билган.
Бунга унинг мунтазам равишда экранларда турли кўрсатув дастурларда чиқиши сабаб бўлган. Ёшлигида фотомодел, рекламачи бўлиб фаолият олиб борган Софи журналистика соҳасига жуда ҳам қизиққан. Маҳаллий радио-телевидение мактабини тамомлаганидан кейин ЛCН телеканалида ишлай бошлаган. Медиа саноатидаги фаолияти сабаб ҳам у турмуш ўртоғини учратган. Mercedes-Benz томонидан ташкил қилинган хайрия тадбирида бошловчиликка таклиф қилинади ва айнан шу тадбирда Жастин ҳам қатнашади.
Пен Лиюан
Хитой раиси Си Цзиньпин машҳурликда рафиқаси Пендан ортда деса ҳам хато бўлмайди. Улар ёшлигидаёқ бир-бирига кўнгил қўйиб учрашишни бошлаган, аммо бу вақтда Си эндигина сиёсатга қадам қўйган йигитча бўлса, Пен Хитой эстрадасида ўз ўрнини топиб бўлган юлдуз эди. Пен ижод муҳити ҳукм сурган оилада дунёга келган ва мусиқага қизиқа бошлаган.
Унинг онаси опера йўналишида ижод қилганига қарамай, Пен ҳарбий қўшиқлар куйлашни афзал билган. Барча давлат тадбирлари усиз ўтмайдиган бўлиб қолган ва ватанпарварлик руҳидаги қўшиқлар билан мухлислар қалбидан жой олган. Биринчи хоним сифатида Пен бугунги кунда чиқиш қилмай қўйган бўлса ҳам онда-сонда мухлислар кўзини қувнатиб туради.
Вероника Ларио
Силвио Берлусконининг рафиқаси Вероника театр ва кино актрисаси бўлган, аммо юқоридаги хонимлар сингари машҳур бўлмаган. У актрисаликни 70 йиллар ўртасида театрдаги песа ва сериалларда кичик роллардан бошлаган ва бу вақтда Италияда машҳур бўлган режиссёр ва актёр Энрико Мария Салерна билан севишиб юрган.
Айнан Энрико актриса иштирокидаги песаларни саҳналаштирган. Ижро давомида Ларионинг латофати ва актрисалик маҳорати Берлусконининг ҳам эътиборини тортган. Вероника у билан расмий турмуш қургунига қадар ҳам 10 йил бирга яшаган ва айнан шу вақтда бир неча машҳур фильмларда суратга тушган. Аммо турмуш ўртоғининг хиёнатидан кейин ажрашган ва шундан кейин бошқа актрисалар Берлусконининг қалбини забт этган аёл ролини ижро қилишни орзу қила бошлаган.
Ненси Рейган
Ненси Рейган номи билан машҳур бўлган Анна Френсис Роббинс фильмларда турли ролларни ижро этган. Унинг онаси театр ва кино актрисаси бўлган ва Кетрин Хепберн билан дугона эди, шунинг учун ёш Ненси драма бўлимига ўқишга кириб, карьерасини тез ва муаммосиз қуради.
Қизиқарли биографик факт: қиз асосий ролларидан бирини ўрта мактабда, унга Жорж Кауфманнинг “Биринчи хоним” песаси асосидаги мактаб спектаклида бош ролни беришганда ўйнайди.
Кўплаб танқидчилар Ненсининг юлдуз бўлиш учун етарлича истеъдодли эмас эди деб ҳисоблайди. Аммо унинг яна бир жиҳати бор эди: у фойдали алоқалар ўрнатиш ва суҳбатдошларини мафтун этишни биларди. Гарчи Голливуд унга ўзи хоҳлаган унвонни бермаган бўлса-да, Экран актёрлари гилдияси президенти бўлиб ишлаган бўлажак эри билан танишишига сабабчи бўлган. Унинг исми кўпчиликка маълум: бу Роналд Рейган эди.
Никоҳдан кейин бўлажак президентдан фарқли ўлароқ Ненси кинодаги карьерасини тарк этади ва фақат кичик спектакллар ҳамда дастурларда пайдо бўлади, оиласини биринчи ўринга қўяди. Бироқ эр-хотин бир фильмда биргаликда рол ўйнашган — 1957 йилда “Денгиз жодугарлари” фильмида. Улар фильмда асосий ролларни ўйнаган.
Изоҳ (0)