Kimdir shuhrat qozonish, katta gonorar olish, jurnallarda suratga tushish va blokbasterlarda rol o‘ynashni orzu qilar ekan, quyidagi mashhurlar allaqachon yulduzlik hayotidan to‘yib bo‘lishgan. Shovqin-suronli Gollivud shunchalik joniga tegganki, ular qizil gilamlar va tig‘iz ish jadvalidan voz kechishga qaror qilishdi. Endi ular uchun oila, farzandlar va shaxsiy hayot birinchi o‘rinda.
Kemeron Dias
Kemeron Dias 2025-yil boshida “Yana ishga” komedik jangari filmida bosh rol bilan ekranga qaytadi. Bu so‘nggi o‘n yilda uning ishtirokidagi birinchi loyiha hisoblanadi. 2018-yilda u kinodan ketishga qaror qilib, oilasi bilan ko‘proq vaqt o‘tkazishni istaganini aytgandi. Diasning ijtimoiy tarmoqlaridagi profili endi uning yulduz emas, balki uy bekasi ekanligini ko‘rsatadi. Profil tavsifida birinchi o‘rinda “ona”, ikkinchi o‘rinda esa “aktrisa” deb yozilgan.
“Kinoda suratga tushayotganda, sening ustingdan to‘la egalik qilishadi. Suratga olish maydonchasida kuniga 12 soatlab bir necha oy ishlaysan. Boshqa narsalarga vaqt qolmaydi. Men hayotimning bir qismini boshqa odamlarga berayotganimni angladim. Ular uni olib qo‘yishmoqda. Shunchaki hayotimni qaytarib olishim, hayotim uchun mas’uliyatni o‘z zimmamga olishim kerak edi”, deya tushuntirgan edi Kemeron.
Jennifer Lourens
Yaqinda Jennifer Lourens ikkinchi farzandiga homilador ekani ma’lum bo‘ldi. Ehtimol, u yana tanaffus olib, bor vaqtini farzandiga bag‘ishlar. Eslatib o‘tamiz, Jennifer 2019-yilda galereya egasi Kuk Maroni bilan turmush qurgan va 2022-yilda ular ilk farzandi Sayning ota-onasi bo‘lishgan. Bu davr mobaynida Lourens atigi uchta loyihada ishtirok etgan. Aftidan, yulduz uchun hozir oilasi va tug‘ilajak farzandi birinchi o‘rinda. Ammo Jennifer mashhurligi haqida qayg‘urmasa ham bo‘ladi. U allaqachon shunday muvaffaqiyat va ommaga ega bo‘ldiki, uni esdan chiqarish qiyin.
Rianna
Xonanda musiqiy faoliyatini tugatganini e’lon qilmagan bo‘lsa-da, muxlislari undan yangi musiqalar kutishdan allaqachon umid uzishgan. 2016-yilda Rianna o‘zining sakkizinchi studiyaviy albomi Anti’ni chiqardi, bu hozircha uning oxirgi albomi. Uzoq tanaffus yulduzning shaxsiy hayoti bilan bog‘liq. 2022-yil may oyida Rianna birinchi farzandini dunyoga keltirdi, 2023-yilning avgustida esa yana ona bo‘ldi. Shunga qaramay, yulduz butunlay omma e’tiboridan chetda qolmadi. Rianna faol ravishda biznes bilan shug‘ullanmoqda. Unga tegishli Savage X Fenty ichki kiyim brendi va Fenty Beauty kosmetika brendi bor. Shuningdek, yulduz hali ham jurnallar uchun suratga tushishda davom etmoqda, lekin deyarli barcha fotosessiyalar endi oilasi bilan, jumladan, farzandlari va sevgilisi A$AP Rocky bilan birga. Intervyular mavzusi ham asosan shaxsiy hayoti va onalik haqida.
Rianna iyun oyida, aslida bu vaqt davomida musiqani unutmaganini va yangi albom ustida uzoq ishlaganini ma’lum qildi. Yaqin orada albomni chiqarishga va’da berdi.
Uning shijoatini inobatga olsak, albom bu yil chiqishi mumkin. Lekin har bir detalni sinchkovlik bilan ko‘rib chiqayotganini hisobga olsak, aniq bir sana haqida gapirishga hali erta.
Yeva Mendes
Yeva Mendesning holati ham shunga o‘xshash. Uning ishtirokidagi so‘nggi loyiha — 2014-yilda chiqqan “Qanday qilib maxluqni tutish mumkin” nomli fantastik detektiv. Shundan beri aktrisa ekranlarda ko‘rinmayapti — bu qarorini oilasiga bag‘ishlanishni xohlagani bilan izohlagan edi.
Yeva Rayan Gosling bilan turmush qurgan va ular birga ikki qizni tarbiyalashmoqda. Bunday mashhur va muvaffaqiyatli turmush o‘rtog‘idan o‘zib ketish qiyin, shuning uchun Mendes karyerasini davom ettirish imkonini Goslingga taqdim etgan ko‘rinadi. Aytishicha, u allaqachon o‘zining karyera cho‘qqisiga erishganini his qilgan. So‘nggi ma’lumotlarga ko‘ra, Yeva hozircha aktrisalik faoliyatiga qaytishni rejalashtirmayapti. U bolalarini tarbiyalash va uy-ro‘zg‘or ishlari bilan shug‘ullanishni afzal ko‘rmoqda.
Izoh (0)