“Телерадиоэшиттириш тўғрисида”ги қонун лойиҳаси қабул қилинса, жамоат телевидениесини ташкил этишга ҳуқуқий асос яратилади. Бу ҳақда 19 октябрь куни Тошкент шаҳрида ўтказилган сўз эркинлигига доир тадбирда МТРК раиси ўринбосари Мадамин Сафаров маълум қилди.
Пойтахтда бўлиб ўтаётган “Халқаро ҳамкорлик ташаббуслари ҳафталиги” доирасидаги мулоқотда Мадамин Сафаров жамоат телевиденияси пайдо бўлиши рақобат учун муҳимлигини айтди.
Анча вақтдан бери "Телерадиоэшиттириш тўғрисида"ги қонун лойиҳаси қабул қилинишини кутяпмиз. Ўйлайманки, бу ҳужжат бўлажак янги депутатлар томонидан қабул қилинади. Қонун билан мамлакатимизда жамоат телевидениесини ташкил қилишга ҳуқуқий замин яратилади. Жамоат телевидениеси давлат телерадиоканаллари билан ҳақиқий рақобатга киришади, соҳа ривожланишига ва демократик принциплардан бири бўлган сўз эркинлиги янада мустаҳкам қарор топишига хизмат қилади, деди мутахассис.
Мулоқотда Мадамин Сафаров МТРКни ривожлантириш бўйича бешта режани санаб ўтди.
Аввало, телерадиоканалларга замонавий бошқарув менежментларини жорий қилиш, телеканалларнинг молиявий мустақиллигини таъминлаш бўйича амалий ишлар бошланди. Иккинчи йўналишимиз хусусий секторнинг давлат телеканалларига кириб келишини таъминлашдан иборат. 2030 йилгача хусусий сектордан харид қилинадиган маҳсулотлар улуши камида 30 фоизга етказилиши керак. Бунда маҳсулотлар продакшнлар, аутсорсинглардан сотиб олинади. Натижада хусусий секторни қўллаб-қувватлашга катта рағбат берилади. Учинчидан, телерадиоканалларимизни интернетга интеграция қилишнинг техник ва технологик ечимлари устида ишлаяпмиз. Тўртинчидан, МТРКни техник ва технологик жиҳатдан тубдан модернизация қиламиз. Бешинчидан, телерадио соҳасидаги халқаро тажрибани ўрганяпмиз. Масалан, BBC мутахассислари ва туркиялик ҳамкорлар билан фаол ишлаяпмиз, дея таъкидлади МТРК масъули.
Раис ўринбосарининг қўшимча қилишича, МТРКга қарашли телеканалларда тўғридан тўғри эфирлар улуши ортган. Эфирлар йирик студияларда ташкил этилиб, бевосита суҳбатларда кенг аҳоли қатламлари қатнашяпти. Улар мавзулар юзасидан ўз фикр ва таклифларини бемалол ифода этмоқда.
Изоҳ (0)