“Teleradioeshittirish to‘g‘risida”gi qonun loyihasi qabul qilinsa, jamoat televideniyesini tashkil etishga huquqiy asos yaratiladi. Bu haqda 19-oktyabr kuni Toshkent shahrida o‘tkazilgan so‘z erkinligiga doir tadbirda MTRK raisi o‘rinbosari Madamin Safarov maʼlum qildi.
Poytaxtda bo‘lib o‘tayotgan “Xalqaro hamkorlik tashabbuslari haftaligi” doirasidagi muloqotda Madamin Safarov jamoat televideniyasi paydo bo‘lishi raqobat uchun muhimligini aytdi.
Ancha vaqtdan beri "Teleradioeshittirish to‘g‘risida"gi qonun loyihasi qabul qilinishini kutyapmiz. O‘ylaymanki, bu hujjat bo‘lajak yangi deputatlar tomonidan qabul qilinadi. Qonun bilan mamlakatimizda jamoat televideniyesini tashkil qilishga huquqiy zamin yaratiladi. Jamoat televideniyesi davlat teleradiokanallari bilan haqiqiy raqobatga kirishadi, soha rivojlanishiga va demokratik prinsiplardan biri bo‘lgan so‘z erkinligi yanada mustahkam qaror topishiga xizmat qiladi, dedi mutaxassis.
Muloqotda Madamin Safarov MTRKni rivojlantirish bo‘yicha beshta rejani sanab o‘tdi.
Avvalo, teleradiokanallarga zamonaviy boshqaruv menejmentlarini joriy qilish, telekanallarning moliyaviy mustaqilligini taʼminlash bo‘yicha amaliy ishlar boshlandi. Ikkinchi yo‘nalishimiz xususiy sektorning davlat telekanallariga kirib kelishini taʼminlashdan iborat. 2030-yilgacha xususiy sektordan xarid qilinadigan mahsulotlar ulushi kamida 30 foizga yetkazilishi kerak. Bunda mahsulotlar prodakshnlar, autsorsinglardan sotib olinadi. Natijada xususiy sektorni qo‘llab-quvvatlashga katta rag‘bat beriladi. Uchinchidan, teleradiokanallarimizni internetga integratsiya qilishning texnik va texnologik yechimlari ustida ishlayapmiz. To‘rtinchidan, MTRKni texnik va texnologik jihatdan tubdan modernizatsiya qilamiz. Beshinchidan, teleradio sohasidagi xalqaro tajribani o‘rganyapmiz. Masalan, BBC mutaxassislari va turkiyalik hamkorlar bilan faol ishlayapmiz, deya taʼkidladi MTRK masʼuli.
Rais o‘rinbosarining qo‘shimcha qilishicha, MTRKga qarashli telekanallarda to‘g‘ridan to‘g‘ri efirlar ulushi ortgan. Efirlar yirik studiyalarda tashkil etilib, bevosita suhbatlarda keng aholi qatlamlari qatnashyapti. Ular mavzular yuzasidan o‘z fikr va takliflarini bemalol ifoda etmoqda.
Izoh (0)