Ўзбекистон Профессионал футбол лигаси (ПФЛ) ҳамда UzReport-TV ўртасида Про-Лига мусобақасининг медиа ва тижорат ҳуқуқлари бўйича шартнома имзоланди.
ПФЛ хабарига кўра, мазкур шартнома 2024 йилнинг 31 декабрига қадар амал қилади.
Таъкидланишича, UzReport-TV футбол ишқибозларининг миллий футболга бўлган қизиқишларидан келиб чиқиб, шунингдек, мамлакат футболи ривожига ҳисса қўшиш мақсадида ЎзПФЛга таклиф билан чиққан. Бир ойга яқин давом этган музокаралар якунида икки томон ўзаро манфаатли келишувга эришган.
«2020 йилнинг 1 августидан бошлаб UzReport-TV Про-Лиганинг ҳар бир туридан энг қизиқарли ва марказий учрашувларни UzReport-TV ва Futbol-TV телеканаллари орқали жонли эфирда намойиш этади. Келишувга кўра, учрашувларни жонли трансляция қилиш ҳажми йилдан йилга ортиб боради», – дейилади хабарда.
Бундан ташқари, эндиликда томонлар Про-Лига мусобақаси учун титул ва расмий ҳомийлар масаласида ҳам ўзаро ҳамкорлик қилади. Шунингдек, Суперлигада бўлгани каби йирик компаниялар билан шартнома имзолаш ҳам режалаштирилмоқда.
Эслатиб ўтамиз, аввалроқ Ўзбекистон футбол ассоциацияси (ЎФА) футбол бўйича Суперлига ва Ўзбекистон Кубоги баҳслари трансляция ҳуқуқини сотиш бўйича тендер эълон қилганди. Унга кўра, мазкур тендер фақат интернет ресурслари учун эканлигини таъкидланганди. МТРК таркибидаги «Спорт» телеканали эса ПФЛ билан келишув асосида Coca-Cola Суперлига ўйинларини бепул трансляция қилишда давом этади.
Маълумот учун, Суперлига 9-туридан кейин «Пахтакор» 22 очко билан мусобақа жадвалида пешқадамлик қилмоқда. Кучли учликдан эса ОКМК (21) ва «Навбаҳор» (17) клублари жой олган.
Мавзуга доир: Суперлига 10 ва 11-тур тақвимига ўзгариш киритилди
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)