«Болангизнинг официантлик қилиши шармандалик, дейишган». Муҳаббат Ҳамроева ижара қийинчиликлари, оиласи, фарзандлари ҳақида (видео)

«Ёр-ёр» кўрсатуви бошловчиси, журналист Муҳаббат Ҳамроева «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Журналист Муҳаббат Ҳамроева суҳбат давомида оиласи билан ижарада яшаган йиллари, ҳалигача фарзандларига қаттиққўллиги, оиласи ҳақида гапириб берди.

Аввало, қадамингиз қутлуғ бўлсин, 30-35 йиллардан буён шу халққа хизмат қилиб келаётган бўлсам, шунча йиллардан буён биринчи журналист уйимга кириши. Тўғрисини айтадиган бўлсам, акангиз, яъни турмуш ўртоғим бундай пиар ёки интервьюларни қўллаб-қувватламайдилар. «Меҳмон бўлиб келишса, бош устига, аммо интервью шарт эмас», дейдилар.

Уйимизда тонг жуда ҳам эрта саҳардан бошланади. Узоғи билан 7:00 ёки 7:30 да ҳамма ишга кетади.

(Кулиб) Ҳовлимизни акангиз билан бўлишиб олганмиз. Ҳовлининг менга тегишли бўлган қисмига гулларни, жамбилларни ўзим экканман. Дарахтларни акангиз экканлар.

Ҳовлимиздаги ушбу фавворани акангиз билан биргаликда шундай тошлар билан безатиб, тайёрлатишни ният қилганмиз ва худди шундай тайёрлатганмиз. Акангиз билан келишмай қолган вақтларимда шу фаввора ёнига бориб, аразлаб ўтириб оламан. Шунақа кичкинагина уйда яшаймиз.

Бу хонадонга 2004 йилда кўчиб келганмиз.

Узоқ йиллар ижара уйда яшаганмиз. Ижара уйда фақат битта гиламчамиз бўларди. У гиламчани ҳам уйнинг эгаси раҳми келгани учун бизга берганди. Эркин Воҳидовнинг кўчаларида, «Huvaydo» кўчасида Маҳфуза опа деган опанинг уйида ижарада яшаганмиз. Энг ёмони, уйимиз цемент қилинган ер эди. Жуда ҳам зах эди, бел ўшанда олинган. Битта палос, тўртта кўрпача, иккита косамиз бўлган.

Акангизнинг бирорта ўртоғи келиб қолса, мен чиқиб турардим, чунки косамиз иккита бўлган. Бухородан, уйдан ҳеч нарса олиб келмаганмиз. Чунки мен ҳам отасиз ўсган қизман, акангиз ҳам оддий деҳқоннинг боласи бўлганлар. Орқамизда катта танишларимиз бўлмаган. Ҳаётда нимагаки эришаётган бўлсак, энг аввало, Аллоҳимнинг неъмати сабабли ва акангиз иккаламизнинг тинимсиз меҳнатимиз сабабли деб ўйлайман.

Муҳаббат Ҳамроева, журналист, бошловчи, продюсер

Акангиз ҳам жуда ақлли инсонлар. Уларнинг миялари компьютер дейман. Божхона соҳасидаги энг ақлли, зукко инсонлардан бири. Ҳаёт йўлларимда нимадандир қоқиладиган бўлсам, шу инсондан маслаҳат сўраб, билмаганларимни ўрганаман. Кичкинагина уйчамизда, ўзига хос катта қалбли инсон билан яшайман.

Учта фарзандимиз бор. Барчаси олий маълумотли. Бирорта фарзандимизга ота-онасининг номидан фойдаланишга рухсат бермаганмиз. Чунки биз нимага эришган бўлсак, таниш-билишларсиз, «танка»-ю қўнғироқларсиз ўзимиз эришганмиз. Сизлар ҳам шунга ўрганасизлар, деганмиз. Йиқилган бола қайтиб туришни, бурни қонаган бола артиб, тозалашни ўргансин, йиқилган туриб, этагини қоқиб, йўлида давом қилишни ўргансин, деймиз.

Болаларим «Ватан» тўйхонасида официант бўлиб ишлаганида «эй, Муҳаббат опа, нима қиляпсизлар, болаларингиз нега официант бўлиб ишлаяпти, шармандалик эмасми», дейишган. Акангиз шунда «менинг бола тарбиямга аралашманг», дегандилар. Мен ҳам буни тўғри қабул қилганман. Лекин болангизнинг оғир меҳнат қилишини кузатиб туриш осон бўлмас экан.

Муҳаббат Ҳамроева, журналист, бошловчи, продюсер

Муҳаббат Ҳамроева Бухоро вилояти, Шофиркон туманида дунёга келган. МТРК ҳамда бошқа хусусий телеканалларда «Эрта сўнган юлдузлар», «Сўнмас юлдузлар», «Унутмоқ осонмас сизларни», «Бахт формуласи» «Сукунат туғёнлари», «Ёр-ёр» кўрсатувларининг 3 000 дан ортиқ сонига муаллифлик ва бошловчилик қилган. Муҳаббат Ҳамроева «Севинч ноласи», «Эрта сўнган юлдузлар», «Севгингдан бахтиёрман», «Сўнмас юлдузлар», «Кечиккан китоб» асарлари муаллифи. «Шуҳрат» медали соҳибаси. «Ижод медиа» продюсерлик маркази раҳбари. Оилали, уч фарзанднинг онаси, беш набиранинг бувижониси.