Ўзбекистон Суперлигасининг сўнгги тур ўйинлари санаси ўзгарди

Футбол бўйича Ўзбекистон Суперлигасининг 2022 йилги мавсумининг сўнгги тур ўйинлари 11 ноябрда ўтказилиши белгиланганди.

ПФЛ 26-тур ўйинлари 12 ноябрга кўчирилганини эълон қилди. Бунга МТРК техникалари Самарқанд шаҳрида ўтадиган Туркий давлатлар ташкилоти саммитига жалб этилиши сабаб қилиб кўрсатилган.

ПФЛ Қатарда бўлиб ўтадиган Жаҳон Чемпионатини инобатга олиб, Суперлиганинг сўнгги турини баҳордаёқ 19 ноябрь санасига ўзгартирганди. Бироқ Ўзбекистон терма жамоасининг 16 ноябрь куни Қозоғистонга қарши беллашувда майдонга тушиши масаласи куз ойида маълум бўлди.

Ўзбекистон терма жамоаси йиғини сабаб, 26-тур баҳсларини 11 ноябрга қадар суриш режаси ишлаб чиқилди. Боиси, Сречко Катанец терма жамоа билан йиғинни 12 ноябрда бошлашни режалаштирган.

Маълум бўлишича, 11 ноябрь куни Самарқанд шаҳри Туркий давлатлар ташкилоти саммитига мезбонлик қилади. Самарқанд кетма-кет иккинчи бор йирик тадбирни қабул қилаётганидан келиб чиқиб, МТРК техникалари 11 ноябрь куни мазкур шаҳарга жалб этилади.

Табиийки, мазкур жараёнда ҳал қилувчи 7 та беллашувни ўтказиш трансляция масаласида муаммолар келтириб чиқаради. Шу жиҳатлар инобатга олиниб, 26-тур 12 ноябрь куни бўлиб ўтади.

ПФЛ баёноти

Ҳозирда Суперлигада совринли ўринлар масаласи, Про-Лигага йўл олувчи иккинчи жамоа номи ва плей-офф учрашуви иштирокчиси аниқ бўлиб улгурмаган.