Шуҳрат Содиқов бош вазир котибияти раҳбари лавозимига тайинланди

Шуҳрат Содиқов бош вазир котибияти раҳбари лавозимига тайинланди. Бу ҳақда бош вазир матбуот котиби хабар берди.

Тайинловга қадар у бош вазир котибияти раҳбарининг ўринбосари лавозимида ишлаб келаётган эди.

Шуҳрат Содиқов (1969 йилда туғилган) 2010 йилдан Вазирлар Маҳкамасида Ахборот тизимлари ва телекоммуникациялар масалалари бўйича ахборот-таҳлил департаменти мудири бўлиб ишлаган. Аввалроқ 2008—2010 йилларда “Ўзбектелеком” компанияси бош директори, 2006—2008 йилларда шу компания бош директори ўринбосари сифатида фаолият кўрсатган.

Шуҳрат Содиқов 2018 йилнинг августидан 2021 йилнинг ноябригача АКТ вазири лавозимида ишлаган. Ўзбекистонда Telegram, YouTube, Instagram, Facebook, “Одноклассники” каби тармоқлар вақтинча чекланиши ортидан президент фармони билан лавозимидан озод этилганди.

2021 йил 3 ноябрь куни Ахборотлаштириш ва телекоммуникациялар соҳасида назорат бўйича давлат инспекцияси (“Ўзкомназорат”) Telegram, YouTube, Instagram, Facebook, “Одноклассники”нинг Ўзбекистондаги фаолиятини чеклагани ҳақида хабар берилганди.

Шундан сўнг, Президент матбуот котиби Шерзод Асадов “Ўзкомназорат”нинг бир ёқлама, узоқни ўйламай қилган ҳаракатидан давлат раҳбари хабар топганини маълум қилди. Ахборотлаштириш ва телекоммуникациялар соҳасида назорат бўйича давлат инспекцияси бошлиғи Ғолибшер Зияев эса нотўғри ва келишилмаган хатти-ҳаракатлари учун эгаллаб турган вазифасидан четлатилди.

У 2023 йил февралдан буён Миллий телерадиокомпания (МТРК) раиси лавозимига тайинланган Абдурашид Жўрабоевга ўринбосарлик қилиб келаётган эди.