“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 16-сони мавзуси “Ички ишларнинг ички ишлари” бўлиб, дастур меҳмони сифатида ИИВ матбуот котиби Шоҳрух Ғиёсов таклиф этилди.
— ИИВ матбуот хизматига 2019 йил ноябрь ойида келдим. Ишни ташкил қилиш масаласи интернет ва ижтимоий тармоқлардан бошланди, веб-ресурслар билан ишлаш бўлимини ташкил қилиб, навбатчилик ташкил қилдик: учта ходим бир сутка давомида бутун интернет маконини мониторинг қилади, икки сутка дам олади. Бу бизнинг катта ютуқларимиздан бири бўлди. Жамоатчиликнинг эътибори кўп бўлган ижтимоий тармоқларда ўз саҳифамизни очдик. Вазирлик расмий сайтини қайта ташкил қилдик. Ички ишлар вазирлиги аҳоли учун 47 та йўналишда хизмат кўрсатади, шундан 24 таси ҳозир онлайн тартибда, сайтимизда бериб борилади. Ўтган йили сайтдан 1 млн 600 дан ортиқ фуқаро фойдаланган. Таққослаш учун, 2019 йилгача бу кўрсаткич 50 мингта ҳам бўлмасди.
Яна бир ютуғимиз, нотижорат давлат органлари орасида бизнинг сайт одам сони бўйича миллий қидирув тизимида биринчи учликдан (ССВ ҳамда Меҳнат вазирлиги билан) тушмай келади. Бундан ташқари, янгиликларга биринчи манба бўлиш мақсадида сайтимизда кунига 20 тагача маълумот қўйиб борилади. Умумий вилоятларни ҳисобга олганда, соҳавий хизматлар билан 22 та сайтимиз бор, ҳаммасини олиб қарасак, ички ишлар органлари фаолияти бўйича кунига 70 дан ортиқ маълумот берилади.
Telegram’да Ички ишлар вазирлигининг 17 та, барча вилоятларни ҳам ҳисобга олганда 39 та расмий саҳифаси мавжуд бўлса, умумий обуначилар сони 500 мингдан зиёд. Шунингдек, YouTube платформасига ҳам катта эътибор қаратяпмиз, бу тармоқда 205 мингдан ортиқ обуначимиз бор. Бу кўрсаткич ҳаттоки МДҲ давлатлари Ички ишлар вазирликларининг YouTube каналларидагидан ҳам кўп. Бу ютуқларнинг барчаси керакли, қизиқ контент қўйиб борганимиздан.
Медиа марказимиз томонидан 10 та туркум кўрсатувлар тайёрланади. Ёшлар, боғча болалари учун ҳам мўлжалланган “Митти майор” номли дастуримиз ҳам бор. Ҳар ойда бир марта ички ишлар органлари соҳасини тўлиқ ёритиб берадиган “Бугунги ракурс” номли кўрсатувимиз ҳам бор. Бундан ташқари, ҳафталик дайжест ҳам тайёрлаймиз.
Ижтимоий тармоқлардан ташқари, телевидениега ҳам катта эътибор берамиз. МТРК ҳамда нодавлат телеканаллар билан меморандум тузиб, 13 та даврий — ҳафталик ва кунлик кўрсатувлар тайёрлаймиз. Радиога ҳам эшиттиришлар тайёрлаб берамиз, шу пайтгача 5,5 мингдан ортиқ эшиттириш берган эканмиз. Шунингдек, вазирлик радиоканалини тузиш режаси ҳам бор, бу, албатта, маблағга боғлиқ бўлгани учун тўхтаб турибди.
Газета-журналларда ҳам, ўтган йил ҳисобида 9 мингга яқин мақола берганмиз. Ўз нашрларимиздан “Постда”, “Қалқон” газеталари 50 минг нусхада, журналларимиз 19 минг ададда чиқади. Фақат материаллар тайёрлаб эфирга беришдан ташқари, жонли мулоқот ҳам қиламиз, — дейди Ички ишлар вазирлиги матбуот котиби.
Кўрсатувни тўлиқ тарзда “Дарё”нинг YouTube’даги саҳифаси орқали томоша қилиш мумкин.
Изоҳ (0)