«Ёр-ёр»га чиқиш пулликми? 700 дан ортиқ тўйга ва Тўхтамурод Азизовни дори олиб юришга мажбур қилган кўрсатув ҳақида (видео)

Эфир юзини кўргандан буён оммабопликни йўқотмай келаётган ЗўрТВ каналининг «Ёр-ёр» кўрсатувига чиқиш пулликми, «Ёр-ёр»га чиққанларининг кейинги тақдири нима бўлади ёки ҳаммаси шунчаки шоу учун, кўрсатув трендда бўлиши учун қилинадими.

«Дарё» мухбири Феруз Муҳаммад ушбу саволларга «Ёр-ёр» кўрсатуви муаллифи Муҳаббат Ҳамроева ҳамда кўрсатувнинг бошқа ижодий жамоасидан жавоб олди.

«Ёр-ёр» кўрсатувига чиқиш мутлақо бепул, ҳеч қачон пул билан ишламаймиз, лекин, баъзи ҳолларда иштирокчилар келиб, «мен кўрсатувга чиқмасдан номзодимни қўймоқчиман, бунинг эвазига пул бераман», дейишади. «Бу газета ёки радио эмас, сиз телевидения эканлигини билиб келяпсиз, илтимосингизни бажаришнинг иложи йўқ», дея тўғри тушунтиришга ҳаракат қиламиз.

Бизга умуман қарашли бўлмаган группалар, одамлар бор. Улар «Ёр-ёр»га чиқмоқчи бўлган одамлардан пул олиб, бизни яъни «Ёр-ёр» кўрсатуви ижодкорларини рақамини беришади ва «шу рақамларга қўнғироқ қилсангиз муаммонгиз ҳал бўлади», дейишади. Пул берган одамлар бизга телефон қилиб, «бизга фалончани рақамини беришга мажбурсан», деб талаб қилишади. «Бизнинг ўз тартиб-қоидамиз бор», деганимизда, кимгадир пул беришганини айтиб шикоят қилишади.

Садоқат Эшмуродова, журналист, «Ёр-ёр» кўрсатуви ижодий жамоаси аъзоси

«Ёр-ёр» кўрсатувига чиққан иштирокчиларнинг кейинги тақдири нима бўлади?

«Ёр-ёр»га чиққан ҳар бир иштирокчининг кейинги тақдири биз учун жуда қизиқ, муҳим. «Ёр-ёр»да ишлайдиган қизларимиз жуда кўп. Улар ҳар бир иштирокчига телефон қилиб, иштирокчиларнинг тақдири нима бўлаётганини сўраб чиқамиз. Шу орқали натижалардан доимий хабардормиз.

Шу кунга қадар «Ёр-ёр»га чиққанлар орасида 700 дан ортиқ инсон ўз бахтини топиб, тўй қилиб, турмуш қуришди. Айниқса охирги ойларда бир кун ёки икки кун ичида бир ҳафталик кўрсатувнинг съёмкаси бўладиган бўлса, ҳеч бўлмаганда уч ёки тўрт инсон эфирнинг ўзида ўз бахтини топишмоқда.

Садоқат Эшмуродова, журналист, «Ёр-ёр» кўрсатуви ижодий жамоаси аъзоси

Кўрсатув муаллифи ва бошловчиси Муҳаббат Ҳамроева кўрсатувга келган аччиқ қисматли инсонларни дардини кўп тинглаганидан ёнида юрак дори олиб юриши ҳақида.

Учаламиз ҳаттоки кўрсатувдан чиқиб, юрак дориларини ичиб, кейин кўрсатувни олиб борган вақтларимиз бўлган. Бир-биримиздан хабар ололмай, уч кунлаб ётиб қолиб, ундан сўнг телефон қилиб саломатмисиз, аҳволингиз яхшими дейишга куч топган пайтларимиз бўлган.

(Тўхтамурод Азизов юрак оғриғини босадиган дорини кўрсатиб). Мен ёнимда юрак оғриғини қолдирадиган дори олиб юришга мажбур бўлганман.

Журналистика этика, эстетика қоидалари бор. Журналист суҳбатдошининг дунёсига кирмасдан, масалани ўртада туриб ҳал қилиши керак. Лекин шу ҳолат менинг қўлимдан келмади. Ҳар бир иштирокчини ўзимнинг яқинимдек, жигаримдек қабул қиламан. Уларни шунчаки тингловчиси бўлиб қолмадик. Уларни дарддоши бўлдик. Ҳозир дўстлар, ўртоқлар кўп, аммо кўнгилни эшитадиган инсонлар қолмади. Жамиятда мана шундай оддий, самимий инсонларни қалбини тинглайдиган кўрсатувлар ҳам бўлиши керак. Балки шу сабабдан кўрсатувимизни одамлар севиб томоша қилишаётгандир.

Муҳаббат Ҳамроева, журналист, бошловчи, продюсер

Муҳаббат Ҳамроева Бухоро вилояти, Шофиркон туманида дунёга келган. МТРК ҳамда бошқа хусусий телеканалларда «Эрта сўнган юлдузлар», «Сўнмас юлдузлар», «Унутмоқ осонмас сизларни», «Бахт формуласи» «Сукунат туғёнлари», «Ёр-ёр» кўрсатувларининг 3 000 дан ортиқ сонига муаллифлик ва бошловчилик қилган. Муҳаббат Ҳамроева «Севинч ноласи», «Эрта сўнган юлдузлар», «Севгингдан бахтиёрман», «Сўнмас юлдузлар», «Кечиккан китоб» асарлари муаллифи. «Шуҳрат» медали соҳибаси. «Ижод медиа» продюсерлик маркази раҳбари. Оилали, уч фарзанднинг онаси, беш набиранинг бувижониси.