Ўзбекистон Миллий телерадио компанияси Япония пойтахти Токио шаҳрида ўтказиладиган ёзги Олимпия ўйинлари трансляциясини 850 минг АҚШ доллари эвазига сотиб олган.
Бу ҳақда қозоғистонлик шарҳловчи Дмитрий Мостовой маълум қилди. Журналист Қозоғистон телекомпаниялари нима сабабдан Олимпиада трансляция ҳуқуқини сотиб олмаётгани борасидаги мақоласида бу ҳақда айтиб ўтган.
Мостовойнинг қайд этишича, Токиодаги Олимпия ўйинлари трансляцияси учун Қозоғистондан 7,5 миллион доллар талаб қилинган. «Худди шундай ҳуқуқ учун Ўзбекистон бор-йўғи 850 минг доллар тўлаган, холос», — дейди Мостовой.
Унинг эътибор қаратишича, Олимпиада телеҳуқуқига мамлакатларнинг имкониятига қараб турли нархлар белгиланади. Мостовой Қозоғистон телевидениеси аввалги Олимпиадаларни қанча маблағ эвазига сотиб олганини эслаган. 2008 ва 2010 йиллар (ёзги ва қишки ўйинлар) — 300 минг доллар, 2012 ва 2014 йиллар — 1,1 млн, 2016 ва 2018 йиллар — 5,1 млн доллар.
Эслатиб ўтамиз, 23 июль куни Токио—2020 Олимпиадаси очилиш маросими бўлиб ўтади. Мусобақа 8 августга қадар давом этади. Ўзбекистон делегацияси 17 та спорт тури бўйича 65 та йўлланмага эга бўлган. Ўзбекистонлик спортчилар 24 июлдан ўз иштирокини бошлайди.
Изоҳ (0)