Жоуан Роулинг қаламига мансуб Гарри Поттер ҳақидаги китоблар тўпламининг янги аудио версияси тақдим этилади. Лойиҳа тақдимоти 2025 йилнинг сўнгги чорагида Amazon’нинг Audible хизматида бўлиб ўтади. Мазкур аудиокитоб устида Pottermore Publishing ҳам иш олиб бормоқда, деб ёзади “Правила жизни” нашри.
Аудиокитобга исмлари эълон қилинмаган 100 дан ортиқ актёрлар овоз беради. Қайд этилишича, лойиҳанинг Warner Bros.га тегишли кинофраншиза билан ҳеч қандай алоқаси йўқ.
Amazon Audible ва Pottermore Publishing ҳамкорликда бўлажак лойиҳа учун трейлер чиқарди. Унда овоз ёзиш студияси, микрофонлар, ва Гарри Поттер кўзойнаклари тасвирланган. Видеода Роулинг китобларидан иқтибослар келтирилган:
Таъкидланишича, тингловчилар “юқори сифатли овоз, иммерсив саундтрек ва кўплаб қаҳрамонлар таркиби” туфайли қизиқарли саргузаштлар дунёсига саёҳат қилиш имконига эга бўлади.
Гарри Поттер ҳақида ҳикоя қилувчи китоблар ва фильмлар сўнгги ўттиз йил давомида бутун дунёда миллионлаб мухлисларни жалб эта олди. Биз Audible фойдаланувчилари учун сеҳрли мактаб ҳақида ҳикоянинг янги талқинини намойиш этишдан жуда хурсандмиз. Умид қиламизки, янги лойиҳа франшизанинг эски ва янги мухлисларига бирдек манзур бўлади, — деди Audible директори Боб Карриган.
Еттита аудиокитобнинг ҳар бири кетма-кетлик тартибида, аввал “Гарри Поттер ва ҳикматлар тоши”дан бошлаб чиқарилади.
1999 йилда ёзиб олинган Гарри Поттер ҳақидаги эски аудиокитоблар эса Audible’да қолади. Унга актёрлардан Стивен Фрай ва Жим Дейл овоз берган. Сервисга жойлаштирилган вақтдан бошлаб мазкур аудиокитоблар 1,4 миллиард соатдан ортиқ вақт давомида тингланган.
Изоҳ (0)