“Ҳизбуллоҳ” ҳаракати раҳбари Наим Қосим 5 август куни тўғридан тўғри Исроилга таҳдид қилди. У телемурожаат орқали агар яҳудий давлати Ливанга ҳужум бошласа, “Ҳизбуллоҳ” бунга ракетали зарба билан жавоб беришини айтди. Бу ҳақда Al Arabiya хабар берди.
Мазкур баёнот Ливан ҳукумати “Ҳизбуллоҳ”нинг қуролланишини чеклаётган пайтда янгради. Айни пайтда эса АҚШ Теҳрон томонидан қўллаб-қувватланадиган гуруҳни қуролсизлантириш бўйича Байрутга босим ўтказмоқда.
Исроил Ливанга қарши кенг миқёсдаги тажовузга қўл урадиган бўлса, “Ҳизбуллоҳ” Ливан армияси ва халқини ўзи ҳимоя қилади. Исроил ҳудудига ракеталар учирилади ва уларнинг 8 ой давомида яратган хавфсизлик тизими бир соат ичида яксон бўлади, деди Қосим.
Маълумот учун, АҚШ воситачилигида 2024 йил ноябрь ойида эришилган сулҳ Исроил ва “Ҳизбуллоҳ” ўртасидаги бир неча ойлик қуролли тўқнашувларга якун ясаган эди. Мазкур урушда ҳаракатнинг юқори мартабали раҳбарлари, жумладан Наим Қосимнинг ўрнида бўлган шахс — Ҳассан Насруллоҳ ҳалок бўлиб, қурол-аслаҳаларнинг катта қисми йўқ қилинган эди.
Қосим бу борада баёнот берар экан, урушда 5 минг нафар “Ҳизбуллоҳ” жангчиси ҳалок бўлгани, уларнинг 13 минг нафари эса яраланганини маълум қилган. Шунга қарамай, у ҳаракат “тартибли ва жангга тайёр” ҳолатда қолаётганини, зарурат туғилса, энг оғир қурбонликларга тайёр эканини таъкидлаган.
АҚШ ва Ливан июнь ойидан буён “Ҳизбуллоҳ”ни қуролсизлантириш бўйича “йўл харитаси” устида музокаралар олиб бормоқда. Режага кўра, ҳаракат қуролларни топшириши эвазига Исроил ўз ҳужумларини тўхтатади, жанубдаги 5 та можароли ҳудуддан яҳудий қўшинлари олиб чиқилади ва урушда вайрон бўлган ҳудудларни тиклаш учун маблағ ажратилади.
Аммо музокараларда сезиларли силжиш бўлмагач, АҚШ Ливан вазирларидан тез фурсатда расмий баёнот беришни талаб қилган. Қосим эса бу босимларга қарши чиқиб, Исроил олдин ҳарбий ҳаракатларини тўхтатмас экан, ҳеч қандай масала — қурол ва келишув — муҳокама қилинмаслигини билдирган.
“Аввало Исроил тажовузи тўхтатилсин. Шундан сўнггина қурол масаласини муҳокама қиламиз”, деган у.
Изоҳ (0)