“Герри Поттер”даги омон қолган бола ҳикояси бизга оддий, аммо жуда муҳим ҳақиқатларни эслатади.
Бахтни пулга сотиб олиб бўлмайди
Жоан Роулинг бу ғояни икки оиланинг ҳикояси орқали очиб беради. Уизлилар жуда камтарона уйда яшайди, болалар бир-бирининг кийимларини кийишга мажбур, ота-оналар эса зўрға кун кечиради. Малфойлар, аксинча, ҳашаматли мулкка эга ва доимо ўз бойликларини кўз-кўз қилади.
Шу билан бирга, Уизлилар оиласида ўйин-кулги муҳити ҳукм суради, аммо Малфойлар носоғлом муносабатларга эга. Улар танлаган йўл ҳақиқатан ҳам оилага ҳашамат олиб келган, лекин уларни илиқлик ва қувончдан маҳрум қилган, улар хатосини сага охирига яқин тушунади.
Албатта, моддий фаровонлик жуда ёқимли нарса бўлиб, у ҳаётни кўп жиҳатдан яхшилайди. Лекин бахтни пулга сотиб олиб бўлмайди.
Инсоннинг кимлиги бошқаларга қилган муносабати билан белгиланади
Гарри бу ҳаётий сабоқни чўқинтирган отаси Сириус Блэкдан ўрганади: “Агар одамнинг ҳақиқатда қандай эканини билмоқчи бўлсанг, ўзи тенгиларга эмас, балки ўзидан қуйида турганларга қандай муносабатда бўлишига эътибор бер”.
Тарих давомида ёвуз одамлар бу фикрнинг ҳақиқатини қайта-қайта исботлаб келган. Масалан, Долорес Амбриж кентаврлар ва бошқа ноинсоний мавжудотларни менсимайди. Ёки қони тоза бўлмаган сеҳргарларни таъқиб қилувчи ўлим шарпалари.
Блэкнинг насиҳати оддий одамлар дунёсида ҳам амал қилади. Мақоми бўйича ўзига тенг ёки ундан юқори бўлганлар билан мулоқот қилишда одам жуда ахлоқли бўлиши мумкин. Лекин унинг асл қиёфаси қўли остидаги ходимларга бўлган муносабатида намоён бўлади.
Ҳар қандай орзу амалга ошиши мумкин
“Қақнус ордени” қисмида Жинни Уизли эгизак акалари Фред ва Жорж билан бир том остида яшаш унга битта муҳим нарсани ўргатганини тан олади: “Бу дунёда имконсиз нарса йўқ, энг муҳими сендаги жасорат”.
Уизлилар истакларни кейинроққа қолдирмаслик учун ҳозир ҳаракат қилиш кераклигининг ёрқин намунасидир. Аввалига ҳеч ким уларнинг “Уизлиларнинг сеҳрли буюмлари” дўконини очиш ғоясини жиддий қабул қилмайди. Аммо Фред ва Жорж ўз позицияларида мустаҳкам туради. Улар мактабни ташлаб, бизнес қилади ва энг қийин пайтларда ҳам ўз бизнесларини ривожлантиришга муваффақ бўлади.
Ҳар бир орзуга эришиш учун жасорат керак. Ака-ука Уизлилар сеҳр туфайли эмас, балки ўзларини бахтли қиладиган ва индивидуаллигини акс эттирадиган фаолиятга бағишлаганлари учун муваффақиятга эришади.
Ташқи кўриниш алдамчи бўлади
Том Реддл келишган, хушмуомала, намунали талаба бўлса-да, Базилискни махфий ҳужрадан қўйиб юборади ва магллардан туғилганларни ўлдиради. Сеҳрли мавжудотларга ғамхўрлик қилувчи проффесор Ҳагрид эса қўрқинчли кўринади, лекин аслида у улкан қалбга эга меҳрибон инсон. Ёки Северус Снейпни энг жасур ва фидойи қаҳрамонлардан бири эканлигини билгунга қадар ҳамма уни ёвуз афсунгар деб ўйлайди.
Фильмлар ва китобларда қаҳрамонлар кўпинча драматик ўзгаришларга учрайди. Аммо ҳақиқий ҳаётда бошқаларни ташқи кўринишига қараб баҳоламаслик муҳим сабоқ. Унчалик танимайдиган одамларга ўзларини исботлаш имкониятини беринг — улар сизни ҳайрон қолдириши мумкин.
Орзуларда эмас, ҳақиқий ҳаётда яшаш керак
“Ҳикматлар тоши”да Гарри тасодифан Орзулар кўзгусига дуч келади. Унда ҳар бир киши ўзининг энг эзгу орзуси қандай амалга ошишини кўра олади. Гарри учун энг катта орзу — ота-онасининг ёнида бўлишдир. Бола дунёдан узилиб, вақтини сеҳрли кўзгу олдида соатлаб ўтказишни бошлаши ажабланарли эмас. Бир куни уни профессор Дамблдор кўриб қолади, у Гаррига жуда оддий сўзларни айтади: “Сен тушда яшамаслигинг, ҳақиқий ҳаётни унутмаслигинг керак”.
Ҳамма орзу қилишни яхши кўради. Хаёлий ҳаёт ҳақиқий ҳаётнинг ўрнини эгаллаб олмаса, бунинг ҳеч қандай ёмон жойи йўқ.
Барча буюк инсонлар ишни кичик нарсадан бошлаган
“Қақнус ордени”да Гарри, Рон ва Гермиона Сеҳргарлик вазирлиги уларга машқ қилишга рухсат бермайдиган мудофаа афсунларини ўрганиш учун Дамблдор армиясини тузади. Гарри бошқа ўсмирлар учун ўқитувчи бўлади ва ҳатто илҳомлантирувчи нутқ сўзлайди: “Тарихдаги барча буюк сеҳргарлар худди биз каби мактаб ўқувчилари бўлганини унутманг. Улар буни уддалаган бўлса, биз ҳам қила оламиз”.
Агар ҳаракат қилсангиз, сизда ҳам худди шундай юксак даражага кўтарилиш имконияти бўлади. Ва ҳеч ким сиз қилмоқчи бўлган ишни қилмаган бўлса ҳам, бу амалга ошмайди дегани эмас. Бу сиз биринчи бўлишингиз мумкинлигини англатади.
Энг қийин пайтларда ҳам бахтли бўлиш мумкин
“Бахтни ҳатто зулматда ҳам топиш мумкин, агар ёруғликни унутмаган бўлсангиз”, — дейди профессор Дамблдор “Азкабан маҳбуси”да.
Бутун сага давомида қаҳрамонлар келажакка бўлган яхши ният ва умидни сақлаб қолишга ҳаракат қилади. Улар “Поттер гуруҳи” номли кўнгилочар радио-шоу ўйлаб топади, унинг бошловчилари нафақат янгиликлар ҳақида хабар беради, балки Волдеморт ҳокимият тепасига келганида тингловчиларнинг кайфиятини кўтаради. Улар Дамблдор армиясини Ҳогварц тарихидаги энг қийин даврлардан бирида бир-бирларини қўллаб-қувватлаш учун тузадилар.
Ҳатто энг қоронғи пайтларда ҳам ёруғликни қидиришни тўхтатманг. Агар уни топа олмасангиз, “Поттер” сагаси қаҳрамонлари сингари ўзингиз унинг манбасига айланинг.
Изоҳ (0)