Жоан Роулинг “Гарри Поттер”даги қайси қаҳрамонини “ўлдирганидан” афсуслангани ҳақида сўзлаб берди

Гарри Поттер исмли сеҳргар бола ҳақидаги афсонавий фильмнинг сўнгги қисми севимли қаҳрамонларининг ўлими туфайли кўплаб мухлисларнинг қалбини синдирди. Муаллиф Жоан Роулинг ҳам мухлислар каби асар қаҳрамонларидан бирининг ўлимидан жуда афсусда эканлигини айтди.

Бу борада кўплаб ўқувчилар ва томошабинлар хаёлига келадиган биринчи қаҳрамон Добби исмли сеҳргар элф ёки профессор Северус Снейпдир. Балки муаллиф ўлимидан афсусланадиган қаҳрамон бу Беллатрикс Лестрейнж томонидан совуққонлик билан ўлдирилган Сириус Блек бўлиши мумкин, деб ўйлаймиз.

Аммо бу персонаж ҳатто Фред Уизли ҳам эмас, балки фильмда қисқа муддатга пайдо бўлган иккинчи даражали қаҳрамон бўлиб чиқди. Унинг исми Флориан Фортескю бўлиб, у Диагон аллеясидаги музқаймоқ дўконининг эгаси бўлган.

Поттерморе сайтида Жоан Роулинг бу борада шундай деб ёзди:

“Дастлаб ушбу қаҳрамон учун менда мутлақ бошқа режалар бор эди. У Гаррига ўлим сирларини очишда турли тавсиялар ва йўл-йўриқлар бериши лозим эди. Шунинг учун иккисининг танишуви эрта содир бўлди. Аммо кейинроқ мен Финеас Блек Гаррига ёрдам берувчи инсон ролига кўпроқ мос келади, деб қарор қилдим. Натижада ҳеч қандай жиддий сабабсиз Фортескю қаҳрамонини ўлимга ҳукм қилдим. Аниқроғи, уни Волан де Морт қўллари билан ўлдирдим. Мен бундан афсусдаман”, дейди муаллиф.

Бир қарашда Роулинг Гаррига ёрдам беришдек муҳим вазифани оддий музқаймоқ сотувчисига ишониб топшириш ниятида бўлгани ғалати туюлади. Шу ўринда, Флорианнинг биографиясидан муҳим тафсилотни ёдга олиш лозим: у Хогварц мактабининг собиқ директори Декстер Фортескюнинг авлоди бўлган. Шу сабабли қаҳрамон Гарри учун қимматли маълумотларга эга бўлиши мумкин эди.