“Гарри Поттер”нинг энг ашаддий мухлисларини ҳам ҳайратда қолдирадиган фильмдаги 10 та хатолик

Бутун дунё Гарри Поттер ҳақидаги ҳикояларни яхши кўради. Фильмлари ўнлаб марта томоша қилинса ҳам, китобларни қайта-қайта ўқилса ҳам баъзида ҳатто энг диққатли мухлислар ҳам айрим хатоликларни ўтказиб юборишади. Қуйида Поттернинг ҳатто энг ашаддий мухлисларини ҳам ҳайратда қолдирадиган бир нечта мантиқсизликлар бор.

Нима учун мактаб ўқувчилари форма кийишмайди?

Биринчи фильмда мактаб ўқувчилари доимо форма кийишади. Гарри олган мактубда талабалар форма, шунингдек, учли шляпа кийишлари кераклиги айтилган. Бироқ негадир, кейинги фильмларда талабалар кўпинча Ҳогвартсда оддий маггллар кийимида юришади.

Нега Люциус Мальфой Доббини Ҳогвартсга олиб келади?

Уй эльфлари ўз номи билан — ўзлари боғланган оилага хизмат қилади ва уни эгасининг буйруғисиз тарк эта олмайди. Мазкур саҳнада Мальфой Доббини ўзи билан Ҳогвартсга олиб боради, лекин нега? Гарри уни озод қилиши учунми?

Қандай қилиб Жеймс ва Сириус Гриффиндор формасини кийиб олади?

Саралашдан кейинги саҳнада Лили Жеймс ва Сириус ўртасидаги стулга ўтиради. Қиз Ҳогвартснинг стандарт формасида, болалар эса аллақачон Гриффиндор мантияси ва галстукларини тақиб олган. Аммо уларнинг барчаси биринчи курс талабалари, яъни улар эндигина сараланган ва ҳали факультет формаси берилмаган бўлиши керак эди.

Нега медалён ҳаммага таъсир қилмайди?

Ҳеч кимга сир эмаски, Слизирин медалёни Ронга ёмон таъсир қилди — у ғазабланиб, асабийлашади. Нега Долорес Эмбриж уни бемалол тақиб юра олади?

Медалён билан боғлиқ яна бир қанча саволлар мавжуд. Вазирлик ходимлари қиёфасида бўлган Гарри ва Гермиона суд залида бўлганида, Поттер Эмбрижнинг бўйнидаги медалённи том маънода ҳис қилади. Аммо қаҳрамонлар сал олдин лифтда бирга бўлган ва бир-бирига анча яқинроқ эди. Нега Гарри ўшанда медалённи сезмайди, гувоҳлар йўқлигида уни Эмбриждан тортиб олмайди?

Фильмда “Лондон кўзи” аттракциони қаердан пайдо бўлди?

Саккизинчи фильмнинг ландшафт саҳналаридан бирида “Лондон кўзи” аттракционини кўриш мумкин. Кўпчилик у фақат 2000 йилда очилганини билишади, саккизинчи қисмдаги воқеалар эса 1997 йилда содир бўлади.

Нега Ҳогвартсда бундай ғалати хавфсизлик қоидалари бор?

Фильм давомида “Гарри Поттер” қаҳрамонлари Ҳогвартсни сеҳрли дунёдаги энг хавфсиз жой деб аташади. Аммо мактаб ўқувчилари бу ерда хавфли спорт турлари билан шуғулланишади, ҳалокатли мусобақаларда қатнашадилар, йиртқич ҳайвонлар ва қора сеҳргарлар билан курашадилар.

Бироқ хавфсиз қишлоқ — Ҳогсмидга ота-оналар ёки васийларнинг рухсатисиз бориш мутлақо тақиқланган. Шундай экан, нима учун ҳеч ким, масалан, “Уч сеҳргар” турнирида иштирок этиш учун катталарнинг розилигини талаб қилмайди?

Нима учун Поттерлар уйи сирининг қўриқчиси Жеймснинг ўзи эмас, Петтигрю бўлади?

“Гарри Поттер” китобларидан маълумки, уй эгаси ўз уйи сирининг қўриқчиси бўлиши мумкин. Масалан, Артур ва Билл Уизли мос равишда Норалар ва “Чиғаноқ” коттежининг қўриқчилари бўлишган. Шундай экан, нима учун Поттерлар уйининг қўриқчиси Жеймснинг ёки Лилининг ўзи бўлмаган? Ахир улар сирни Волдемортга ҳеч қачон ошкор қилмасдилар-ку?

Нима учун Гарри супургидан фойдаланмайди?

“Ҳикматлар тоши” китобидаёқ Гарри биринчи марта супургига ўтирганида, унинг учиш қобилиятига эга эканлиги маълум бўлади. Афсуски, у квидич ўйинини ҳисобга олмаганда бу қобилиятидан деярли фойдаланмайди.

Масалан, Волдеморт билан ёки махфий ҳужрада Василиск билан бўлган жангда супургидан фойдаланиши мумкин эди.

Нима учун мактабда таълим бунчалик тизимсиз?

Бундан ташқари, таълим тизимининг ўзи кўплаб саволларни келтириб чиқаради. Сеҳргарларнинг болалари Ҳогвартсга киришдан олдин уйда ўқитилади. Сеҳргарлар болаларини мактабга қандай тайёрлайди, ким уларни ўқиш ва ёзишга ўргатади? Нима учун Ҳогвартсда ҳар қандай одам учун фойдали бўлган биология, математика ва бошқа фанлар ўқитилмайди? Нима учун магллардан туғилган болалар уларни алоҳида ўрганмайди? Нега уларнинг қариндошлари ва танишлари бу болаларнинг билимда орқада қолганлигини сезмайди?