“Гарри Поттер” кинокартинаси юлдузи Дэниэл Редклифф ва унинг севгилиси, актриса Эрин Дарк илк марта фарзандли бўлди, деб хабар бермоқда “Film.ru” нашри.
Папараццилар Нью-Йоркда болалар аравачасини судраб кетаётган жуфтликни суратга олган. Ҳозирча боланинг исми ва жинси маълум қилинмаган. Редклифф ва Дарк биринчи марта 2012 йилда “Яқинларингизни ўлдиринг” биографик драмасида танишган.
Редклиффнинг ота бўлиши ҳақидаги хабарни унинг матбуот котиби март ойида тасдиқлаган эди. Британиялик актёр яқинда “Ғалати: Ал Янкович ҳикояси” биографик фильмида суратга тушди ва биопик “Олтин глобус” ва BAFTA номинацияларига сазовор бўлди.
Маълумот учун, Дэниэл Редклифф 1989 йилнинг 23 июль санасида Буюк Британияда туғилган. Актёр ёзувчи Жоан Роулинг асарлари асосида суратга олинган “Гарри Поттер” фильми қисмларида бош ролни ижро этганидан кейин дунё бўйлаб машҳурликка эришди ва 2009 йилда у Гиннеснинг рекордлар китобига ўн йилликнинг энг кўп гонорар олувчи актёри сифатида киритилди.
Актёр Голливуднинг Шон-шуҳрат хиёбонида ўз юлдузига эга. У кинодаги фаолияти давомида “Гарри Поттер” фильмининг бир нечта қисмларида, “Жунгли”, “Хавфли топшириқ”, “Преториядан қочиш” ва яна кўплаб кинокартиналарда рол ижро этган.
Изоҳ (0)