Салбий ролларни шундай маҳорат билан ўйнаган актёрлар борки, йиллар ўтса ҳам уларни ижобий қаҳрамон образида тасаввур қилиш қийин. Қуйида ана шундай актёрлар ҳақида сўз боради.
Ралф Файнс — “Гарри Поттер” ва ”Шиндлер рўйхати”
Ральф Файнс фаолиятининг аксарият қисмида салбий роллар ўйнаган ва уларнинг баъзилари орқали томошабинлар эътиборига тушган. Айниқса “Гарри Поттер”даги Волдеморт ва “Шиндлер рўйхати”даги Амон Гёт роллари орқали томошабинларга яхши таниш. Актёрнинг кўплаб қизиқарли фильмлари бўлса-да, уни асосан салбий роллари орқали танишади. Актёрнинг ижобий роллари ҳам йўқ эмас. Масалан: “Кингсман: Ибтидо” фильмида ўғлини йўқотган ота, “Гранд Будапешт меҳмонхонаси”да хизматчи Гюстав, “Инглиз бемори” фильмида эса романтик инсон ролини ижро этган.
Жек Глисон — “Тахтлар ўйини”
Жек Глисон учун “Тахтлар ўйини” фильмидаги Жоффри Баратеон роли унинг фаолиятидаги биринчи салбий роль эмас. Шу сабабдан у ҳамма ёмон кўрадиган образларни жонлантиришда энг яхши номзод эди. Жек сериалнинг суратга олиш жараёни тугамасдан туриб, фаолиятини якунлаганини маълум қилди. Сабаб сифатида у ҳар доим бошқа ҳаёт тарзига интилгани айтилди. Қолаверса, мухлислари Жек ўз фаолиятини унда катта из қолдирган фильмдаги Жоффри ролининг таъсири туфайли якунлаганини айтди. Ҳатто “Тахтлар ўйини” китоби муаллифи Жорж Мартин ҳам фильмнинг биринчи сериясини кўргандан сўнг, Жекка мактуб юборади ва энди уни ҳамма ёмон кўриши билан табриклайди.
Имельда Стонтон — “Гарри Поттер”
“Гарри Поттер”да жуда кўп салбий қаҳрамонлар бор ва улар ичида энг ёвузи Волдеморт бўлиб кўринади, лекин у ёвузлик борасида Долорес Амбриж билан тенглаша олмайди. Шуни таъкидлаш керакки, китоб муаллифи Жоан Роулинг Амбриж образининг прототипига реал ҳаётда дуч келган.
Энтони Старр — “Йигитлар”
“Йигитлар” картинасидаги ролигача Энтони унчалик ҳам таниқли бўлмаган Янги зеландиялик актёр эди. Бунгача ижро этган энг катта роли “Банши” телесериалида бўлган. Ҳозир эса уни ҳамма “Йигитлар”даги Ҳоумлендер роли орқали танийди. Образ унга узоқ вақт ҳамроҳлик қилса керак, чунки сериалдан кейин Энтонининг худбин одамдан бошқа қиёфада кўринишига кўникиш қийин бўлади. Шафқатсиз ва ёмон суперқаҳрамон.
Луиза Флетчер — “Какку уяси узра парвоз”
“Какку уяси узра парвоз” фильмида Луиза Флетчер ва унинг ёвуз ҳамшираси Ратчед учун меҳрибонлик, раҳм-шафқат ҳақидаги сўзлар бегона бўлган. Ратчед шу қадар қизиқарли образ бўлиб чиқдики, орадан 45 йил ўтиб, у сериал сифатида экранлаштирилди. Унда Милдред ролини “Американча даҳшатли ҳикоя” фильми қаҳрамони Сара Полсон ўйнаган.
Кристоф Валц —“Манфур кимсалар”
Кино ихлосмандлари америкалик режиссёр Квентин Тарантинога нафақат ажойиб фильмлари учун, балки австриялик таниқли актёр Кристоф Валцни Голливудда кашф қилгани учун ҳам раҳмат айтиши керак. Кристофни Тарантино “Манфур кимсалар” фильмидаги Ганс Ланд ролига таклиф қилгунига қадар узоқ йиллар давомида ватанида ижод қилган. Кристоф бошқа ролларда ҳам муваффақият қозонди: “Алита: Жангчи фаришта” фантастик фильмида Доктор Дайсон Идони маҳорат билан ўйнади. Лекин барибир Кристоф ёвуз роллардан узоқлашмади.
Лина Ҳиди — “Тахтлар ўйини”
Лина Ҳидининг таъкидлашича, “Тахтлар ўйини” мухлислари дастлаб актрисадан Серсея роли сабаб қаттиқ нафратланган. Бир учрашувда улар актрисадан қочиб, ёнидаги бошқа актёрлардан имзо олган. Таъкидлашича, у билан бундай ҳолатлар кўп содир бўлади. Кейинчалик актриса бир қатор ижобий ролларни ҳам ижро этди. Улар орасида “300 та спарталик”, “Бизни бирга тасаввур қил” каби фильмлар бор.
Изоҳ (0)