Google компанияси Жанубий Корея миллий хавфсизлик сиёсатига амал қилган ҳолда сунъий йўлдош тасвирларига айрим ўзгартиришлар киритишини маълум қилди. Унга кўра, эндиликда мамлакат ҳудудидаги ҳарбий объектлар хиралаштириб кўрсатилади. Бу ҳақда Тhе Коrеа Herald хабар берди.
Бу ҳолат мамлакат ҳукумати юқори аниқликдаги харита маълумотларини оммага улашишга рухсат бериш-бермаслик масаласини кўриб чиқаётган бир пайтда юз бермоқда. Google'нинг таъкидлашича, компания энди Жанубий Кореянинг махфийлик сиёстини инобатга олади.
Компания 5 август куни эълон қилган блог постида ўзининг глобал ахборот хизматини ташкил этиш, уни оммага қулай ва фойдали қилиш миссияси ҳақида сўз юритган. Хусусан, бу борада Google Maps асосий рол ўйнаши таъкидланган. Шунингдек, компания Жанубий Корейда харита билан боғлиқ бир қанча муаммолар борлигини санаб ўтган.
“Ҳар йили Жанубий Кореяга 10 миллиондан ортиқ хорижлик ташриф буюради. Аммо улар бу ерга қадам қўйган заҳоти турли муаммоларга дуч келади”, дейилади компания баёнотида.
Гап шундаки, Google хариталарининг йўналиш бўйича ҳаракатланишни кўрсатувчи (turn-by-turn) функцияси Жанубий Кореяда ишламайди. Бу бутун дунёдаги камдан-кам учрайдиган истиснолардан бири саналади.
Google расмийларига кўра, улар Жанубий Корея ҳукумати билан хизматларини тўлиқ фаоллаштириш масаласида мунтазам мулоқот олиб бормоқда. Жумладан, баҳсли масалалар бўйича келишувга эришишга ҳаракат қилинмоқда.
Google’нинг таъкидлашича, 1:25 000 ўлчамдаги харита тасвири навигация жараёни учун етарли эмас ва жуда хира ҳисобланади. Шунинг учун, компания ва мамлакат ҳукумати харита тасвирини 1:5 000 ўлчам этиб белгилашга келишиб олган. Аммо сунъий йўлдош тасвирларига тўхталар экан, Google бу суратларни ҳукуматдан эмас, балки очиқ бозорга эга тижорат провайдерларидан сотиб олишини таъкидлаган.
“Махфий объектларни асл сунъий йўлдош тасвирларида тўғридан тўғри хиралаштириш энг самарали усулдир. Биз ҳукумат билан биргаликда ушбу объектларни яшириш альтернативларини ишлаб чиқмоқдамиз”, деди компания вакилларидан бири.
Жанубий Корея ер, инфратузилма ва транспорт вазирлиги 8 август куни миллий харита маълумотларини оммага тақдим этиш бўйича Google’нинг сўровини кўриб чиқиш учун махсус йиғилиш ўтказиши режалаштирилган. Ушбу қарор аслида май ойида эълон қилиниши керак эди. Бироқ у АҚШ ва Сеул ўртасидаги савдо музокаралари давом этаётгани боис кечиктирилганди.
Маълумот учун, 2011 ва 2016 йилларда ҳам Google худди шундай сўров билан Жабуний Корея ҳукуматига мурожаат қилганди. Бироқ мамлакат ҳукумати ҳар сафар ҳарбий махфий маълумотлар хорижий серверларга чиқиб кетиш хавфи сабаб бунга рад жавобини берган.
Шу орада, 5 август куни Инчонда бўлиб ўтган APEC Global рақамли ва сунъий интеллект форумида “Google Korеа” директори Ким Кёнг Хун харита хавфсзилиги масалалари бўйича саволларга жавоб беришдан бош тортган.
Айни вақтда, Жанубий Корея ҳукумати собиқ президент қароргоҳи — Чонг Ва Де (Кўк уй)ни миллий хавфсизлик объектига айлантириб, жамоатчилик учун ёпганига қарамасдан, Google Maps’да ушбу ҳудуднинг асосий бинолари, дарвозаси, меҳмон уйи ва бошқа деталлар очиқ кўрсатилмоқда.
Аксинча, Naver Маp ва Kakао Маp каби маҳаллий харита хизматлари мазкур объектнинг кўпчилик қисмларини, жумладан кириш жойлари ва ёзувларини хиралаштириб қўйган. Тmap эса ҳатто объект атрофидаги сайёҳлар учун мўлжалланган Сарангчаэ марказини бутунлай харитадан олиб ташлаган. Мазкур масалага изоҳ берган Google Korеа расмийси шундай деди:
“Биз ҳукумат билан яқин алоқани давом эттирамиз ва бу масалага тезда ечим топиш учун масъул ходим тайинлаш, махсус алоқа тармоғини очиш ҳамда махфийлаштириш механизмларини жорий этишни режалаштиряпмиз”.
Изоҳ (0)