Пол Маккартни британиялик мусиқачилар ичида илк миллиардерга айланди

Дунёга машҳур гитарачи, хонанда Пол Маккартни миллиардерлар рўйхатига киритилган илк британиялик мусиқачига айланди. The Sunday Times нашри томонидан ҳар йили чоп этиладиган рейтингга кўра, The Beatles асосчиларидан бирининг бойлиги 1,3 миллиард долларни ташкил этади, деб ёзади “Правила Жизни” нашри.

Сўнгги бир йил ичида 82 ёшли хонанданинг капитали 65 миллион долларга ошди. The Sunday Times’га кўра, мусиқачининг даромади Got Back номли гастрол концертлари туфайли кўтарилиб бормоқда. Ўтган йилда Пол Маккартни турне сафари доирасида 35 та концерт берди.

Даромадининг ошишига унинг муаллифлик ҳуқуқидан тушган фойда ҳамда хонанда Бейонсенинг сўнгги альбоми — Cowboy Carter’га киритилган Blackbird қўшиғига кавери сабаб бўлди.

Буюк Британиянинг энг бадавлат шахслари рўйхатида Пол Маккартни ва унинг рафиқаси Ненси 165-ўринга кўтарилди. Рейтингда биринчи ўринни Hinduja тадбиркорлар оиласи эгаллади. Мазкур рўйхатга Гарри Поттер ҳақидаги китоблар муаллифи Жоан Роулинг (1,1 млрд доллар), қўшиқчи Элтон Жон (600 млн доллар) ҳам киритилган.

Аввалроқ Режиссёр Сэм Мендес Sony Pictures Entertainment студияси билан ҳамкорликда The Beatles гуруҳи аъзолари — Пол Маккартни, Жон Леннон, Жорж Ҳаррисон ва Ринго Старр ҳақида тўлиқ метражли фильмлар суратга олиши маълум бўлганди.