Британиялик актриса Мегги Смит 27 сентябрь куни 89 ёшда оламдан ўтди. Бу ҳақда People talk унинг фарзандлари Тоби Стивенс ва Крис Ларкинга асосланиб хабар бермоқда. Уларнинг сўзларига кўра, актриса ҳаётининг сўнгги кунларини Лондоннинг Честер шифохонасида яқинлари билан ўтказган.
Мегги Смит кино ихлосмандларига Гарри Поттер ҳақидаги фильмларда профессор Минерва Макгонагалл роли, “Даунтон аббатлиги” сериалидаги ижроси ва бошқа кўплаб картиналари билан таниш. У икки карра “Оскар” мукофотининг лауреати бўлган ва 1970 йилда актриса “Мисс Жин Бродининг тонги”, 1979 йилда “Калифорния отели” фильмлари учун тақдирланган.
Ёши 70 дан ошганига қарамай, актриса ўзи ёқтирган иш билан шуғулланишда давом этди. Мегги Смит 1947 йилдан 2023 йилгача 160 дан ортиқ лойиҳаларда, жумладан “Жейн Остеннинг сирли боғи”, “Қуёш остидаги ёвузлик” каби фильмларида иштирок этди.
Смит хоним икки марта турмушга чиққан. 1967 йилда у ҳаётини ҳамкасби Роберт Стивенс билан боғлади ва Крис исмли ўғил кўрди. Икки йил ўтгач, уларнинг иккинчи ўғли Тоби туғилди. Бироқ жуфтлик орадан беш йил ўтиб ажрашиб кетди.
Фото: People talk
1975 йилда Мегги иккинчи марта драматург Беверли Кроссга турмушга чиқди. 2007 йилда Гарри Поттер ҳақидаги фильмнинг олтинчи қисмини суратга олиш пайтида Мегги ўзини ёмон ҳис қилди ва шифокорлар унга кўкрак бези саратони ташхисини қўйди. Шунга қарамай актриса фильмда суратга тушишда тўхтамади ва ишини охиригача давом эттирди.
Мегги Смит Оскар совриндори бўлишдан ташқари етти марта BAFTA мукофотини олган, уч карра Олтин глобус ва тўрт карра Эмми мукофоти совриндори бўлган. Актриса иштирокидаги бошқа фильмлар қаторида «Нилдаги ўлим», «Миссионер», «Биринчи рафиқалар клуби» кабилар бор.
Изоҳ (0)