Jahon tarixida ko‘plab buyuk insonlar: olimlar, yozuvchilar, ixtirochilar, rassomlar va boshqalar o‘tgan. Ularning hayot yo‘li nafaqat darslik va qomuslarda, balki kinematografiyada ham o‘z aksini topgan. Ilmga bo‘lgan g‘ayratingizni oshirish va yangi loyihalar yaratishga ilhomlantirish uchun buyuk insonlar hayoti tasvirlangan film va seriallarni to‘pladik.
“Stiv Jobs. Yo‘qolgan intervyu” (2012)
Filmda 1995-yilda suratga olingan Stiv Jobsning jurnalist va teleboshlovchi Robert Kringliga bergan intervyusi namoyish etilgan. O‘sha paytda Apple hammuassisi ishtirok etgan dastur efirga chiqqan, biroq qisqartirilgan ko‘rinishda. Ammo yillar o‘tib, yo‘qolgan deb hisoblangan yozuvning bir qismi rejissyor Pol Senning garajidan topiladi.
“Stiven Xoking olami” (2014)
Fizika talabasi Stiven Xoking va kelajakda san’atshunos bo‘lmoqchi bo‘lgan Jeyn Uayldning muhabbat qissasi. Film bir lahzada hamma narsa o‘zgarib ketishi mumkinligi haqida hikoya qiladi. Dastlab siz baxtli, intiluvchan, dunyoni anglashga chanqoq yosh olimsiz, keyinchalik esa dahshatli tashxis tufayli hayotingiz uchun kurashishga majbur bo‘lgan insonga aylanasiz. Bu og‘ir davrda Jeyn olimning suyanchiga aylanadi.
“Daho” (2017)
Serialda nisbiylik nazariyasini yaratib, tarixga kirgan fizik Albert Eynshteynning hayoti haqida hikoya qilinadi. Film voqealari o‘qituvchilari ishonmagan, iste’dodsiz deb hisoblagan odam haqida so‘zlaydi, ammo bu uning buyuk bo‘lishiga to‘sqinlik qila olmadi.
“Leonardo” (2021-yil)
Serialda Leonardo da Vinchi va model Katerina da Kremonaning munosabatlari haqida so‘z boradi. Voqealar bir rasmning yo‘qolishi va qizning o‘ldirilishi fonida kechadi — bu fojiada rassom ayblanadi. Tergovchilar vaziyatni aniqlamoqchi bo‘lib, Leonardoni so‘roq qilayotganda, uning hayoti va ijodining muhim bosqichlari namoyish qilinadi.
“Oppengeymer” (2023)
Ikkinchi jahon urushi davrida yadro qurolini yaratish ustida ishlab, Manxetten loyihasiga rahbarlik qilgan fizik Robert Oppengeymer haqidagi keskin syujetli drama. Olim o‘z ishlanmalari tufayli “atom bombasining otasi” degan nomga sazovor bo‘lgan.
“Tetris” (2023)
Syujet markazida “Tetris” nomli mashhur o‘yinni o‘ylab topgan sovet dasturchisi Aleksey Pajitnov turadi. Bu o‘yin Las-Vegasdagi ko‘rgazmada taqdim etilgach, amerikalik tadbirkor Xenk Rojersning e’tiborini tortadi. O‘yin haqiqiy shov-shuvga aylanishini anglagan Rojers Sovuq urush davrida o‘yin huquqlarini sotib olish uchun SSSRga borishga qaror qiladi.
Izoh (0)