Prezidentga tasviriy va amaliy sanʼat sohasini yanada rivojlantirishga oid qaror loyihasi haqida axborot berildi. Bu haqda Prezident matbuot xizmati xabar berdi.
Bu sohalar xalq madaniyatining, yoshlar tarbiyasining ajralmas qismi. Lekin ilgari, o‘nlab yillar davomida rassomlar eʼtibordan chetda qolgandi. Shu bois prezident Respublika Maʼnaviyat va maʼrifat kengashining kengaytirilgan yig‘ilishida bu masalaga to‘xtalib, mutasaddilarga ko‘rsatma bergan edi.
Loyihaga ko‘ra, 2026-2027-yillarda investitsiya dasturi doirasida Badiiy akademiyaning Markaziy ko‘rgazmalar zali va fondi binosini rekonstruksiya qilish, Toshkent fotosuratlar uyida Multimedia markazi tashkil etish rejalashtirilgan.
Eng muhimi, sanʼatsevar yoshlar uchun imkoniyatlar kengaytiriladi. Jumladan, Badiiy fond hududida zamonaviy galereya hamda 40 ta ijodiy ustaxonadan iborat Yosh rassomlar markazi barpo etiladi, Sharq miniatyura sanʼati muzeyida o‘quv-ishlab chiqarish ustaxonasi tashkil qilinadi. Benkov nomidagi rassomlik maktabi taʼmirlanib, 400 o‘rinli qo‘shimcha o‘quv binosi, 200 o‘rinli yotoqxona quriladi.
“Ustoz-shogird” tamoyili asosida yosh qalamkashlarni tarbiyalab kelayotgan tajribali rassomlar qo‘shimcha rag‘batlantirib boriladi. Har yili tanlov asosida eng isteʼdodli ijodkorlar xorijiy mamlakatlarga tajriba almashishga yuboriladi.
Kamoliddin Behzod nomidagi Milliy rassomlik va dizayn institutida taʼlim sifatini oshirish choralari ko‘riladi. Bu yerda ilg‘or xorijiy o‘quv reja va dasturlar bosqichma-bosqich joriy etiladi. Professor-o‘qituvchilarning munosib badiiy asarlari ilmiy monografiyaga tenglashtiriladi. Shuningdek, bu institutni bitirgan mutaxassislarga maktablarda tasviriy sanʼat fanidan dars o‘tishga ruxsat beriladi.
“Yangi O‘zbekiston manzaralari”, “Tarixiy allomalar” va “Zamon qahramonlari” turkumidan ijodiy asarlarni davlat buyurtmasi asosida yaratish tizimi yo‘lga qo‘yiladi.
Prezident hududlarda ham rassomlar uchun sharoitlarni yaxshilash, yoshlarni tasviriy va amaliy sanʼatga jalb etish zarurligini taʼkidladi.
Izoh (0)