Amerika fuqarolari dunyodagi eng kasalmand millatga aylandi. Bu haqda 30-iyun kuni Amerika Qo‘shma Shtatlari sog‘liqni saqlash vaziri kichik Robert Kennedi ma’lum qildi.
Uning aytishicha, Amerikaning sug‘urta va farmatsevtika kompaniyalari, shifoxonalar va shifokorlarning o‘zlari “kasalliklarni davom ettirishdan” daromad olishadi. Shu bilan birga, ko‘pincha tibbiyot xodimlari o‘qish uchun olingan kreditlarni to‘lay olish uchun ushbu tizimga moslashishga majbur bo‘ladilar.
“Sog‘liqni saqlash tizimining har bir jihati biz amerikaliklar kasal bo‘lishimizga qaratilgan va hozirda biz dunyodagi eng kasal millatmiz”, dedi u amerikalik jurnalist Taker Karlson bilan suhbatda.
Kichik Kennedining ta’kidlashicha, 20 yil oldin shifokorlarning atigi 20 foizi korporatsiyalarda ishlagan bo‘lsa, bugungi kunda ularning soni 80 foizga yetgan. Bu tibbiyot kompaniyalari tomonidan qo‘llaniladigan “murakkab rag‘batlantirish usullari” bilan bog‘liq bo‘lib, ular butun tizimni harakatga keltirish uchun zarurdir.
Lancet ilmiy jurnali 2024-yil noyabr oyida Bill va Melinda Geyts jamg‘armasi ko‘magida o‘tkazilgan umumiy tadqiqotni e’lon qildi. Unga ko‘ra, AQSH aholisining 75 foizi ortiqcha vazn yoki semizlikdan aziyat chekadi.
Hisobotda qayd etilishicha, 2021-yilda 25 yoshdan boshlab katta yoshli aholining deyarli to‘rtdan uch qismi ortiqcha vaznga ega bo‘lgan. Shu bilan birga, aniqlik kiritilishicha, 1990-yilda ortiqcha vaznga ega bo‘lgan amerikaliklarning atigi 50 foizi aniqlangan edi.
Izoh (0)