AQSH prezidenti Donald Tramp Kanada bilan savdo muzokaralari zudlik bilan to‘xtatilishini aytdi. Bu haqda BBC xabar berdi.
Ma’lum qilinishicha, AQSH yirik texnologik kompaniyalarga qarshi soliq solishni boshlaydi. Muzokaralarni to‘xtatish qarori e’lon qilinishida oldin bu ikki qo‘shni davlatlar iyul oyi o‘rtalariga qadar savdo bitimi tuzish ustida ishlayotgan edi.
Tramp 2025-yil boshida “savdo urushi”ni boshlab yuborgan edi. U Kanadani “iqtisodiy kuch” yordamida anneksiya qilish bilan tahdid qilganidan so‘ng, ikkala davlat ham bir-birining tovarlariga boj joriy qilgandi.
AQSH prezidenti 27-iyun kuni texnologik kompaniyalarga solinishi rejalashtirilayotgan “og‘ir soliqlar” tufayli ikki mamlakat savdo muzokaralarni to‘xtatayotganini bildirgan. Yaqin bir hafta ichida AQSH va Kanada chegarani kesib o‘tadigan tovarlarga yangi tariflar e’lon qilinishi ham qo‘shimcha qilingan.
“Kanada bilan savdo bo‘yicha barcha muhokamalar darhol to‘xtatiladi. Biz Kanadaga yaqin 7 kun ichida AQSH bilan savdoda qanday boj o‘rnatilishi haqida ma’lum qilamiz”, dedi Tramp.
Ammo, Kanada bosh vaziri Mark Karni jurnalistlarga bergan qisqa izohida muzokaralar davom etishini bildirgan.
“Biz kanadaliklar manfaati uchun bu murakkab muzokaralarni davom ettiramiz”, dedi vazir.
AQSH Kanadaga 2024-yili raqamli xizmatlar uchun 3 foizlik soliq joriy etgan edi. Shundan beri ikki mamlakat munosabatlari birmuncha qiyinlashgan edi. Ushbu soliqning dastlabki to‘lovi shu dushanba kuni amalga oshirilishi kutilmoqda. Hisob-kitoblariga ko‘ra, bu Amazon, Apple va Google kabi Amerika kompaniyalariga yiliga 2 milliard dollardan ko‘proq zarar keltiradi.
Kanada rasmiylari bu masalani AQSH bilan savdo muzokaralari doirasida hal qilishni kutayotgan edi. Kanada bosh vaziri Mark Karni va Trampning nisbatan iliq munosabatlari savdo muzokaralarida qo‘l kelishi taxmin qilinayotgan edi.
AQSH Kanadaning asosiy savdo sherigi hisoblanadi. 2024-yili AQSH mamlakatdan uzoq muddatli erkin savdo shartnomasi doirasida 400 milliard dollardan ortiq tovar sotib olgan.
Ammo Tramp bu savdoga 2025-yil boshida chegaradagi giyohvand moddalar savdosini bahona qilib, yangi 25 foizlik tarif bilan zarba bergan. AQShning avtomobillar, po‘lat va alyuminiyga joriy etgan yangi bojlari ham ikki davlat munosabatlarni buzgan. Masalan, avtomobil ehtiyot qismlari avtomobil to‘liq yig‘ilgunga qadar AQSH, Meksika va Kanada chegaralarini bir necha bor kesib o‘tishga to‘g‘ri keladi.
Izoh (0)