Toshkent xalqaro aeroportida odam savdosining oldi olindi. Bu haqda Samarqand viloyati IIB matbuot xizmati xabar qildi.
Xabarda aytilishicha, 21-iyun kuni Toshkent xalqaro aeroporti hududida odam savdosi bilan bog‘liq navbatdagi jinoiy faoliyatning oldi olindi. Toshkent shahrida yashovchi 53 yoshli ayol jinoiy guruh tashkil qilib, moddiy qiyinchilikda qolgan 31, 23 va 18 yoshli uch nafar qizni Tailand Qirolligiga fohishalik qilish maqsadida jo‘natishni rejalashtirgan.
IIV Tezkor-qidiruv departamenti, Samarqand viloyati IIB va DXX hamkorligida o‘tkazilgan maxsus tadbir natijasida ayol aeroportda, qizlarni yuborish paytida ashyoviy dalillar bilan qo‘lga olingan.
Ayolning Tailanddagi 53 yoshli erkak tanishi ushbu qizlarni kutib olib, ish bilan ta’minlashi evaziga 5000 AQSH dollari yuborishi va uch oy mobaynida fohishalik qilib, pul ishlab berishi sharti bilan kelishib olingan bo‘lgan.
Unga nisbatan Jinoyat kodeksining 135-moddasi (odam savdosi) bo‘yicha jinoyat ishi qo‘zg‘atilgan va u protsessual tartibda qamoqqa olingan.
Bunday holatlar soni ortib bormoqda
Mart oyida Toshkentda 22 yoshli ayol ikki tengdoshini Rossiyaga sotib yuborayotganda qo‘lga olingandi. Iyun oyida Toshkent viloyatida qizlarni fohishalik uchun Turkiyaga jo‘natayotgan ayol ushlandi.
Avgustda esa Toshkent aeroportida 20 yoshli qizni aldab, Dubayga fohishalikka yuborayotgan erkak ushlangandi.
Shuningdek, Toshkent xalqaro aeroportida ayol Turkiyaga 20 yoshli qizni fohishalik uchun jo‘natayotgan vaqtda ushlangan.
Izoh (0)