So‘nggi 24 soat ichida Isroil hujumlari sabab G‘azo sektori bo‘ylab kamida 81 falastinlik halok bo‘lgan, yana 400 dan ortiq tinch aholi jarohat olgan. Bu haqda anklav hududida faoliyat ko‘rsatuvchi sog‘liqni saqlash idoralari ma’lum qildi.
Isroil kuchlari qochqinlar vaqtincha istiqomat qilayotgan stadion yaqiniga zarba berib, kamida 11 kishi, jumladan bolalarni o‘ldirdi. Tarmoqlarda insonlar tuproq ostida ko‘milib qolgan yaqinlarini quruq qo‘l va belkuraklar bilan qutqarib olishga harakat qilayotgani aks etgan kadrlar paydo bo‘ldi.
Bundan tashqari, anklavning Al-Mavasi hududida yana bir oilaning besh a’zosi, xususan ota-ona va 3 nafar farzand uyquda bo‘lgan vaqti o‘ldirildi. Boshqalar bilan qo‘shib hisoblaganda, mana shu hududning o‘zida 14 kishi halok bo‘ldi.
Sektorning Tuffah tumanida esa kamida 8 kishi, jumladan 5 nafar bola halok bo‘ldi. Hujum nishoni o‘z uyidan ko‘chirilgan fuqarolar vaqtincha yashayotgan muassasa edi.
“Bu hudud chodirlar bilan to‘la edi. Endi chodirlar qum ostida qolgan. Biz jasadlarni chiqarib olish uchun qo‘llarimiz bilan soatlab kovladik. Bu yerda na qidiruvdagilar bor, na terrorchilar. Faqat tinch fuqarolar va bolalar bo‘lgan”, dedi guvohlardan biri Ahmad Qishaviy Reuters’ga.
Isroil tomoni esa Tuffahga zarba yuzasidan bayonot berib, go‘yoki tahdid tug‘dirgan noma’lum shaxs nishonga olinganini iddao qilgan.
“Hujumdan avval tinch aholiga zarar yetkazmaslik uchun choralar ko‘rildi”, deya da’vo qilgan yahudiy rasmiylari.
Sulh va muzokaralar:
AQSH prezidenti Donald Tramp G‘azo masalasiga to‘xtalib, tomonlar kelasi hafta ichida sulhga erishishi mumkinligini aytdi. Tel-Avivda esa 28-iyun kuni hukumatga qarshi namoyish bo‘lib o‘tdi. Ular Netanyaxu idorasidan HAMAS ixtiyorida saqlanayotgan asirlarni ozod qilish uchun kelishuv imzolashni talab qilmoqda.
Bu 2023-yildan buyon davom etayotgan mojaro yakunlanishiga kichik bo‘lsa-da, umid bermoqda. Biroq tahlilchilar Qatar mezbonlik qilayotgan sulh muzokaralari natijasiga katta umid bog‘lamayapti. Ikki milliondan ortiq aholi qamal qilingan anklavda esa qon to‘kilishi to‘xtamayapti.
Izoh (0)