AQSH mudofaa vaziri Pit Hegset Pentagon razvedka boshqarmasi rahbari hamda ikki yuqori martabali qo‘mondonni lavozimidan ozod qildi. Bu Donald Tramp ma’muriyati tomonidan Pentagonda amalga oshirilgan navbatdagi tozalash sifatida baholanmoqda.

Lavozimidan olinganlardan biri Harbiy razvedka boshqarmasi (DIA) rahbari, general-leytenant Jeffri Kruse bo‘lib, uning nima sababdan ishdan bo‘shatilgani noma’lum. Xuddi shu kuni AQSH dengiz floti zaxira kuchlari rahbari va Dengizdagi maxsus operatsiyalar qo‘mondoni ham o‘z kursisidan mahrum bo‘ldi.
AQSH Senatining razvedka qo‘mitasi raisi o‘rinbosari, senator Mark Uorner Pentagon rahbarining mazkur qaroriga munosabat bildirib, “razvedka xizmati mamlakatni himoya qilish vositasi emas, balki sodiqlik sinovi sifatida ko‘rilayotgani”ni aytdi.

Oldingi tozalashlar
Bu Tramp ma’muriyati harbiy va razvedka tizimida olib borayotgan “tozalash” jarayonining navbatdagi bosqichi sifatida baholanmoqda. Joriy yil aprel oyida prezident Milliy xavfsizlik agentligi (NSA) direktori general Timoti Xouni ishdan olgan, oqibatda Oq uy Milliy xavfsizlik kengashidan o‘nlab xodimlar ketkazilgandi.
Fevralda esa Pentagon rahbari Pit Hegset Qo‘shma shtab boshliqlari qo‘mitasi raisi, havo kuchlari generali C.Q. Braunni, besh nafar admirallar hamda generallarni lavozimidan ketkazgan edi. Bu AQSH harbiy establishmentidagi misli ko‘rilmagan o‘zgarish bo‘ldi.
Kruse nega ishdan olindi?
Harbiy razvedka boshqarmasi rahbarining ishdan olinishiga rasmiy sabab ko‘rsatilmagan. Biroq taxminlarga ko‘ra, bu qaror tuzilmaning Eron yadroviy obyektlariga zarbalar natijasi bo‘yicha tarqalgan maxfiy hisobotidan so‘ng qabul qilingan bo‘lishi mumkin. Hujjatda zarbalar Tehron dasturini atigi bir necha oyga ortga surgani aytilgan edi. Bu Donald Trampning obyektlar “butunlay yo‘q qilingani” haqidagi bayonotiga zid bo‘lib chiqdi.

Mazkur xulosaning ommaviy axborot vositalarida tarqalishi AQSH prezidentini g‘azablantirdi. Oq uy hisobotni “mutlaqo noto‘g‘ri” deb atadi, Tramp esa uni e’lon qilgan CNN, New York Times va boshqa nashrlarni “soxta yangiliklar” tarqatishda aybladi.
Kruse lavozimidan olingani haqidagi xabardan ikki kun oldin AQSH Milliy razvedka boshqarmasi direktori Tulsi Gabbard 37 nafar amaldagi va sobiq razvedkachilarning xavfsizlik ruxsatnomalarini Tramp buyrug‘iga asoslanib bekor qilgan edi. Avvalroq sobiq prezident Jo Bayden va Trampning saylovdagi raqobatchisi Kamala Harris ham shunday munosabatga duch kelgan.
Izoh (0)