AQSH prezidentining maxsus vakili Richard Zauber ishonch bildirishicha, surishtiruv Jo Baydenning ofisi va uyida topilgan maxfiy hujjatlar u yerga tasodifan borib qolganini ko‘rsatadi. Uning qayd etishicha, Oq uy butun tekshiruv davomida Adliya vazirligi bilan yaqindan hamkorlik qilgan va ish bo‘yicha maxsus prokuror bilan hamkorlikni davom ettirmoqda, deb yozadi The Hill.
“Ishonchimiz komilki, puxta tekshiruv bu hujjatlar bexosdan yo‘qolib qolganini ko‘rsatadi, prezident va uning advokatlari esa bu xatolik yuzaga chiqqanidan keyin zudlik bilan choralar ko‘rgan”, — deyiladi Zauberning bayonotida.
12-yanvar kuni AQSH adliya vaziri maxfiy hujjatlar Vashingtonda qachonlardir Jo Bayden ishlagan tahlil markazi ofisiga va uning Delaverdagi xususiy uyiga qanday borib qolganini tekshirish uchun maxsus prokuror tayinlagan edi.
10-yanvar kuni Amerikaning Penn Biden Center tahlil markazida AQSHning amaldagi prezidenti Jo Baydenning vitse-prezidentlik davridagi maxfiy hujjatlar topilgani xabar berilgan edi.
Hujjatlar yashirin ma’lumotni o‘z ichiga olmagan boshqa qog‘ozlar bilan birga saqlangan. Materiallar noyabr boshida, oraliq saylovlar arafasida Baydenning ishonchli vakillari tomonidan topilgan.
Shundan keyin bu haqda AQSH milliy arxiviga xabar berilgan. Baydenning advokatlari hujjatlarni topshirishni taklif qildi, u vaqtda materiallarni taqdim etish haqida so‘rov hali kelib tushmagandi.
Ular orasida Amerika razvedkasi hamda Ukraina, Eron va Buyuk Britaniyaga oid brifinglar materiallari bo’lgan.
CBS ma’lumotlariga ko‘ra, surishtiruvda FQB (Federal qidiruv byurosi) va Chikago prokurori qatnashmoqda.
Keyinroq Baydenning Delaver shtati Uilmington shahridagi uyida maxfiy hujjatlar aniqlandi. Ma’lum qilinishicha, maxfiy hujjatlar garajdagi omborxonadan topilgan, ular aslida arxivda saqlanishi kerak bo‘lgan.
Baydenning shaxsiy advokati Richard Soberning aytishicha, garajda saqlanadigan shaxsiy va siyosiy hujjatlar orasida Obama ma’muriyatiga oid bir qancha maxfiy hujjatlar bor. Garajga tutash xonada hujjatning yana bir sahifasi topilgan. Hujjatlarning mazmuni haqida advokat hech narsani ochiqlamagan.
2022-yil avgustida Trampning uyidan maxfiy ma’lumotlardan iborat hujjatlar topilgandi. Sobiq davlat rahbari “Josuslik to‘g‘risidagi qonun”ni buzganlikda gumonlanmoqda. Bu ish bo‘yicha maxsus prokuror tayinlangan.
Izoh (0)