Har kuni ko‘chalarda yuzlab avtomobillarga duch kelamiz. O‘nlab mashhur brendlar hammamizga tanish. Ammo ularning qanday ma’no anglatishini bilasizmi?
Volvo
Bu avtomobillar 1924-yildan buyon ishlab chiqarilmoqda. Volvo logotipidagi doira va o‘qcha qadimiy Rimda temir ramzi bo‘lgan. Bu esa kuch, chidamlilik va xavfsizlikni ifodalaydi. Volva lotincha “volvere” fe’lidan kelib chiqqan, u “men dumalayman” degan ma’noni bildiradi. Shuning uchun Volvo brendi o‘zini “dumalaydigan, harakat qiladigan, mustahkam va xavfsiz mashina” sifatida tanitgan.
Audi
Bu avtomobillar XX asrning boshida - 1909-yildan boshlab ishlab chiqarila boshlangan. Marka nomi mashina asoschisining familiyasi — Avgust Xorchning lotinchadan so‘zma-so‘z tarjimasidir. Audi so‘zi “tingla” degan ma’noni anglatadi. Qizig‘i shundaki, kompaniya asoschisi bu so‘zni ilk bor o‘z hamkorining o‘g‘lidan eshitgan ekan.
Volkswagen
Bu nemis avtomobillari XX asrning 30-yillarida ishlab chiqarila boshlangan. Muhandislarning yagona maqsadi oddiy odamlar uchun arzon mashina yaratish edi. Nom ustida uzoq bosh qotirish shart bo‘lmadi. Volkswagen nemis tilidan aynan “xalq avtomobili” deb tarjima qilinadi.
Mazda
Mazda brendi 1920-yillarda paydo bo‘lgan bo‘lsa-da, hozirgi nomi faqat 1984-yilda qo‘yilgan. Ammo bu shunchaki harflar yig‘indisi emas, balki zardushtiylikning ezgulik xudosi Axura Mazda nomidir. Kompaniya shu yo‘l bilan o‘z obro‘sini ta’kidlamoqchi bo‘lgan. Bundan tashqari, Mazda so‘zi kompaniya rahbari Dzudziro Matsudaning familiyasiga ohangdosh edi.
BMW
Bu mashhur nemis avtomobil va mototsikl ishlab chiqaruvchi kompaniya nomining qisqartmasi bo‘lib, Bayerische Motoren Werke AG — “Bavariya motor ishlab chiqarish korxonasi” yoki oddiyroq qilib aytganda “Bavariya motor zavodi” deb tarjima qilinadi.
Land Rover
Mashina nomi aslida oddiygina ikki so‘zdan iborat: Land – “yer, quruqlik”, Rover – “kezuvchi, sayohatchi, darbadar yuruvchi”. Land Rover — “yer kezuvchisi, har qanday yo‘lni bosib o‘tuvchi avtomobil” ma’nosini bildiradi.
FIAT
Fiat so‘zi ko‘pchilikka brend nomi bo‘lib ko‘rinadi, lekin aslida u qisqartmadan tashkil topgan: Fabbrica Italiana Automobili Torino
— italyan tilidan tarjimasi: “Turindagi Italiya avtomobil fabrikasi”.
Mitsubishi
Avtomobil nomi ikki qismdan iborat: Mitsu (三) – yaponcha “uch” degani, Hishi (菱 / bishi) – yaponcha “rombsimon shakl” degani. Mitsubishi — “uch romb” degan ma’noni bildiradi va logotip ham bevosita shu nomni ramziy tasvirlaydi.
Izoh (0)