Rossiya va Ukraina o‘rtasidagi mojaroda AQSHning sobiq rahbari Jo Bayden aybdor. Bu haqda AQSH prezidenti Donald Tramp Truth Social ijtimoiy tarmog‘ida bildirdi.
“Rossiya va Ukraina o‘rtasidagi urush – bu Baydenning urushi, meniki emas. Men bu yerga yaqindagina keldim va to‘rt yillik prezidentligim davrida bunday holatning oldini olishda hech qanday muammoga duch kelmadim. Men bu mojaroga hech qanday aloqador emasman, lekin o‘lim va vayronagarchilikni to‘xtatish uchun bor kuchim bilan harakat qilyapman”, deb yozdi Qo‘shma Shtatlar rahbari.
Bundan tashqari, u Ukraina prezidenti Vladimir Zelenskiy va Bayden “juda yomon ish qilgani”ni ta’kidlagan. Trampning aytishicha, bu mojaroning oldini olishning ko‘plab usullari bor edi, biroq endi Kiyev rejimi rahbarini to‘xtatishga majbur qilish kerak.
“Agar 2020-yilgi prezidentlik saylovlari soxtalashtirilmagan bo‘lganda, aslida shunday bo‘lgan, ko‘p jihatdan bu dahshatli urush hech qachon yuz bermas edi. Prezident Zelenskiy va firibgar Jo Bayden bu masxarabozlikning boshlanishiga yo‘l qo‘yib, mutlaqo dahshatli ish qilishdi. Uning boshlanishiga yo‘l qo‘ymaslikning ko‘plab usullari bor edi. Lekin bu o‘tmishda qoldi. Endi biz buni tez fursatlarda to‘xtatishimiz lozim. Juda achinarli!”, deydi Donald Tramp.
Donald Tramp Rossiyadan urushni yakunlash bo‘yicha muzokaralarni tezroq boshlashni talab qilgandi. Bundan oldin esa Tramp Bayden ma’muriyatini AQSH va Rossiya munosabatlarini yomonlashtirishda ayblagandi.
Izoh (0)