Tatariston rahbari Rustam Minnixonov rus tilini bilmagan xorijlik bolalarni maktablarga qabul qilishni taqiqlovchi qonunni tanqid ostiga oldi. U bu haqda 22-avgust kuni Innopolisda o‘tgan ta’lim va fan sohasi xodimlari yig‘ilishida aytib o‘tdi.
“Ishlash kerak, tizimli ishlash kerak. Axir bolani maktabga kiritmasangiz, u qayerda yurishi kerak? Tilni bilmagani uchun uning nima aybi bor? O‘rganadi. Har qanday bola uch-to‘rt oyda tilni o‘rganib oladi. Hech qanday dahshatli narsa yo‘q. Umuman olganda, bu — bema’nilik. Bolaga ehtiyotkorlik bilan munosabatda bo‘lish kerak, u aybdor emas”, dedi Tatariston rahbari.
Tatar-inform nashrining yozishicha, hozir Tatariston maktablarida uch mingdan ortiq xorijlik bolalar o‘qiydi. Bundan tashqari, yana 22 mingdan ziyod chet ellik talabalar oliy ta’lim dargohlarida tahsil olmoqda.
“Muhojirlar — bizning mehnat resursimiz. Ularni qayerdan olamiz? Ularning aksariyati qonuniy, mehnatga layoqatli fuqarolar. Shu masalada tizimli ishlashimiz kerak”, deya qo‘shimcha qildi Minnixonov.
U Tataristonda yashayotgan muhojirlarning bolalari rus tilini o‘rganishi uchun maxsus kurslar tashkil qilish haqida ko‘rsatma berdi.
Rustam Minnixonov tanqid qilgan qonun Rossiyada 2025-yil 1-apreldan kuchga kirdi. Unga binoan muhojirlarning bolalari maktabga qabul qilinishdan oldin rus tilida test topshirishlari shart.
Izoh (0)