AQSH prezidenti Donald Tramp yil boshida noqonuniy migratsiyaga qarshi kurashni boshlaganidan so‘ng, AQSHda noqonuniy istiqomat qilayotgan 1 millionga yaqin chet ellik mamlakatdan chiqib ketdi. Bu haqda “Migratsiya tadqiqotlari markazi mustaqil tadqiqot tashkiloti AQSH Mehnat statistikasi byurosi ma’lumotlariga asoslanib xabar berdi.
“Bizning qayta ishlanmagan ma’lumotlar tahlili shuni ko‘rsatadiki, 2025-yilning yanvaridan may oyigacha ishlaydigan va ishsiz chet elliklar umumiy soni 957 ming kishiga kamaygan”, deyiladi tashkilot hisobotida.
Mutaxassislarning dastlabki baholashlariga ko‘ra, 2025-yil may oyiga kelib AQSHda 14,8 million noqonuniy muhojir yashagan - bu yanvar oyiga nisbatan 1 millionga kam.
Hisobot mualliflarining ta’kidlashicha, AQSH fuqaroligiga ega bo‘lmagan chet elliklar Trampning prezidentlik saylovlaridagi g‘alabasi va huquq-tartibot idoralarining muhojirlarni chiqarib yuborish bo‘yicha harakatlarini kuchaytirishi sababli mamlakatni tark etmoqda.
Tramp immigratsiya siyosatini nazorat qilish tarafdori ekanligini bir necha bor ta’kidlagan. U qasamyod marosimidan so‘ng darhol AQSH va Meksika chegarasida favqulodda vaziyat rejimini joriy etish to‘g‘risidagi farmonni imzoladi. Amerika rahbari noqonuniy muhojirlarni mamlakatdan chiqarib yuborish bo‘yicha Amerika tarixidagi eng keng ko‘lamli operatsiyani o‘tkazishni ta’minlash niyatida ekanligini bildirdi.
Izoh (0)