AQSH prezidenti Donald Tramp Los Anjeles shtati milliy gvardiyasi a’zolari va immigratsiyaga qarshi namoyishchilar o‘rtasidagi shiddatli to‘qnashuvlar fonida “Los Anjelesni migrantlar bosqinidan ozod qilishga” va’da berdi. Bu haqda The Independent xabar berdi.
8-iyun kuni prezident Truth Social’da chiqish qildi. Unda president Los Anjelesdan “noqonuniy chet elliklar chiqarib yuborilishi” va shahar “ozod qilinishi”ga va’da bergan.
Los Anjeles markazidagi ko‘chalarda namoyishchilarga qarshi ko‘zdan yosh oqizuvchi gaz va kam halokatli o‘q-dorilardan foydalanilmoqda.
“Bir vaqtlar Amerikaning buyuk shahri bo‘lgan Los Anjeles “noqonuniy chet elliklar va jinoyatchilar tomonidan bosib olindi. Zo‘ravon va qo‘zg‘olonchi olomon bizning deportatsiya operatsiyamizni to‘xtatish uchun Federal agentlarimizga yopirilib, hujum qilmoqda. Men ichki xavfsizlik kotibi Kristi Noem, mudofaa vaziri Pit Xegset va bosh prokuror Pam Bondiga barcha tegishli departamentlar va agentliklar bilan kelishilgan holda Los Anjelesdagi tartibsizliklarga chek qo‘yish uchun zarur bo‘lgan barcha choralarni ko‘rishni buyuraman. Tartib tiklanadi, noqonuniylar chiqarib yuboriladi va Los Anjeles ozod qilinadi”, deb yozgan Tramp.
8-iyun kunidagi tartibsizliklardan keyin kun davomida keskinlik avj olgan. Suratlarda mashinalar yonayotgani, namoyishchilar qurollangan va dubulg‘a kiygan huquq-tartibot idoralari xodimlariga qarata mushakbozlik qilganini ko‘rish mumkin.
Bu namoyishlar Los Anjeles okrugi bo‘ylab 118 nafar migrant, jumladan, 6-iyun kuni 44 kishi hibsga olinganidan keyin boshlanib ketgan.
Izoh (0)