2020-yilda butun dunyo bo‘ylab migrantlar soni 281 million kishiga yetdi. 10 yil oldin bu kabi insonlar soni 221 million kishini, 2000-yilda 173 million kishini tashkil etgan. Bu haqda BMT Iqtisodiy va ijtimoiy kengashi hisobotiga tayanib “Korrespondent.net” xabar berdi.
2020-yili migrantlar sonining ortishi pandemiya sabab sekinlashgan.
Dunyodagi eng ko‘p mingrantlar istiqomat qiladigan davlatlar qatoridan AQSh, Germaniya, Saudiya Arabistoni, Rossiya va Buyuk Britaniya o‘rin olgan.
“Rossiyada 12 million migrant istiqomat qiladi, Buyuk Britaniyada esa 9 million”, — deya ta’kidlanadi hisobotda.
AQSh xalqaro migrantlar uchun asosiy yo‘nalish bo‘lib qolmoqda — 51 million migrant (dunyodagi jami migrantlarning 18 foizi).
Eslatib o‘tamiz, 2020-yilning aprel oyida prezident Donald Tramp AQShga keluvchi migrantlar oqimini to‘xtatish haqidagi qarorni imzolagan edi. Uning so‘zlariga ko‘ra, bu mamlakat iqtisodiyoti o‘sishni boshlaganida jamiyatning barcha qatlamlaridagi ishsiz amerikaliklar birinchi bo‘lib bo‘sh ish o‘rniga da’vogarlik qilishini kafolatlaydi.
Avvalroq O‘zbekistonga 2020-yilning o‘tgan 11 oyi mobaynida 467 ming nafardan ortiq mehnat migrantlari qaytib kelgani to‘g‘risida xabar berilgandi.
Izoh (0)