Isroil harbiylari “Isyonkor sher” operatsiyasi boshlanganidan buyon butun Eron hududida 1,1 mingta turli obyektlarga hujum qildi. Bu haqda Isroil mudofaa armiyasi (SAXAL) rasmiy vakili, brigada generali Efi Defrin brifingda ma’lum qilgan.
“Hozirgi paytga kelib biz (SAXAL) butun Eron bo‘ylab 1,1 mingdan ortiq turli obyektlarga hujum qildik”, dedi u.
Defrin Isroil mudofaa armiyasi rejaga muvofiq tizimli ravishda ishlayotgani va “barcha maqsadlarga erishilmaguncha” buni davom ettirishini bildirgan.
“Biz (SAXAL) Eronning hamma joyida hujumlarni davom ettiramiz. Eron qarshilik ko‘rsatmoqda, ular jang qilmoqda. Ammo biz havo ustidan nazoratni o‘rnatdik va bu nazoratni saqlab qolamiz”, deya qo‘shimcha qildi Defrin.
Isroil armiyasi vakilining ta`kidlashicha, Tehrondagi bir nechta qurol-yarog‘ va raketa ishlab chiqarish obyektlariga zarba berilgan.
“Biz (Eron) yadroviy tahdidining barcha elementlarini zararsizlantirish bo‘yicha rejali ishlarni olib bormoqdamiz. Shuningdek, ularning yer-yer va yer-havo raketalari salohiyatiga ham sezilarli zarar yetkazmoqdamiz. Bundan tashqari, Isroil harbiy-havo kuchlari samolyotlari Tehrondagi bir nechta qurol-yarog‘ va raketa ishlab chiqarish obyektlariga zarba berdi”, deydi Isroil armiyasi vakili.
Isroil 13-iyunga o‘tar kechasi Eronning yadro dasturiga qarshi “Isyonkor sher" operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
Izoh (0)