O‘zbekiston tashqi ishlar vazirining birinchi o‘rinbosari Bahromjon Aʼloyev 17-iyun kuni Eronning O‘zbekistondagi elchisi Muhammadali Iskandariy bilan uchrashuv o‘tkazdi. Bu haqda vazirlik matbuot xizmati xabar berdi.
Suhbat chog‘ida siyosiy, savdo-iqtisodiy, transport-logistika, madaniy-gumanitar va turizm sohalaridagi ikki tomonlama hamkorlikning bugungi holati va rivojlanish istiqbollari muhokama qilindi.
Mintaqaviy muammolar, shu jumladan Yaqin Sharqdagi vaziyatni tinch yo‘l bilan hal etish yuzasidan ham fikr almashildi.
Bundan tashqari, Bahromjon A’loyev Isroilning O‘zbekistondagi elchisi Gideon Lustig bilan uchrashuv o‘tkazdi.
Suhbat chog‘ida O‘zbekiston-Isroil munosabatlarining holati va ularni yanada rivojlantirishning ustuvor yo‘nalishlari, shuningdek, BMT va boshqa xalqaro tashkilotlar doirasidagi hamkorlik muhokama qilindi.
Mintaqaviy muammolar, shu jumladan Yaqin Sharqdagi vaziyatni tinch yo‘l bilan hal etish yuzasidan ham fikr almashildi.
16-iyun kuni Baxtiyor Saidov Ozarbayjon tashqi ishlar vaziri bilan Isroil—Eron mojarosi yuzasidan suhbatlashgandi.
O‘zbekiston Tashqi ishlar vazirligi Isroilning Eronga hujumlari yuzasidan xavotir bildirgandi. Vazirlik barcha tomonlarni to‘liq vazminlikka, harbiy harakatlarni darhol to‘xtatishga va nizoni siyosiy-diplomatik yo‘l bilan hal etishga chaqirgan.
O‘zbekiston Tashqi ishlar vazirligi Yaqin Sharqda tobora keskinlashayotgan harbiy-siyosiy vaziyat munosabati bilan Eron va Isroilda bo‘lgan O‘zbekiston fuqarolariga tavsiyalar bergan edi. Jumladan:
- harbiy va boshqa davlat obyektlariga yaqinlashmaslik, ularni foto va videoga olmaslik;
- odamlar ko‘p to‘planadigan joylardan yiroqda bo‘lish;
- mahalliy hukumat organlari tomonidan berilayotgan ko‘rsatmalarga so‘zsiz rioya qilish, zarurat tug‘ilganda maxsus boshpanalarga yoki xavfsiz joylarga yo‘l olish.
Fuqarolardan zarurat tug‘ilganda O‘zbekistonning Eron va Isroildagi diplomatik vakolatxonalari bilan bog‘lanish so‘raldi.
Izoh (0)