Yaqin Sharqda, xususan, Isroil va Eron o‘rtasidagi vaziyat keskinlashgani sababli, FIFA Isroil klublarida to‘p surayotgan legionerlarga hech qanday kompensatsiyasiz klubni tark etishga ruxsat berishi mumkin. Bu haqda The One nashriga tayanib Euro-Football xabar bermoqda.
Avvalroq Isroilning Beer-Shevaning “Hapoel” klubi portugaliyalik futbolchi Yuri Medeyrushni qo‘yib yuborgani ma’lum bo‘ldi. Futbolchi mintaqadagi vaziyat tufayli o‘z xavfsizligidan xavotirga tushgani sababli klubni tark etishga qaror qilgan. Shuningdek, “Hapoel Haifa” bilan shartnoma imzolagan yana bir portugaliyalik — Robinyu ham Isroilga uchib kelmagan va jamoaga qo‘shilmagan.
FIFA ushbu masalada ilgari ham shunga o‘xshash qarorlar qabul qilgan edi. Jumladan, 2022-yilda Rossiya va Ukraina o‘rtasidagi harbiy mojaro boshlanganidan so‘ng, Rossiya Premyer Ligasidagi legionerlarga ham shartnomani bir tomonlama bekor qilish imkoniyati berilgan edi.
Shunga qaramay, hozircha Isroil klublarining xalqaro musobaqalardan chetlatilishi haqida hech qanday rasmiy qaror yo‘q. Bu qaror ularning Yevropaning turli musobaqalarida ishtirokini hozircha taqiqlamaydi.
Izoh (0)