Isroil bosh vaziri Binyamin Netanyaxu 8-dekabr kuni Suriya chegarasiga bordi va prezident Bashar Asad rejimi Isroil tufayli qulaganini aytdi. Bu haqda The Times of Israel xabar berdi.
Netanyaxuning so‘zlariga ko‘ra, Isroilning Eron va “Hizbulloh”ga qarshi hujumi Suriyadagi rejimning ag‘darilishiga turtki bo‘ldi.
Bu Yaqin Sharq tarixida tarixiy kun. Har qanday dushman kuchining chegaralarimizda qaror topishiga yo‘l qo‘ymaymiz. Asad rejimi Eron “yovuzlik o‘qi”ning markaziy bo‘g‘ini hisoblanadi — bu rejim quladi.
Bu Asad rejimining asosiy tarafdorlari bo‘lgan Eron va “Hizbulloh”ga bergan zarbalarimizning bevosita natijasidir. Bu Yaqin Sharqda bu zulm va zo‘ravonlik rejimidan xalos bo‘lishni istaganlar uchun zanjirli reaksiya uyg‘otdi, dedi Isroil bosh vaziri.
U mudofaa vaziri Kats bilan Suriya chegarasidagi Isroil armiyasining kuzatuv punktini ko‘zdan kechirdi.
“Isroil u bilan tinch-totuv yashashni istagan barcha suriyaliklarga do‘stlik qo‘lini cho‘zadi, ammo dushman kuchlarining chegara yaqinida mustahkamlanishiga yo‘l qo‘ymaydi”, dedi Netanyaxu.
Shuningdek, u G‘azoda garovga olinganlarning oilalariga Suriyadagi hokimiyat almashishi o‘g‘irlab ketilganlar ozod etilishini tezlashtirishi mumkinligini ma’lum qildi.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etgani haqida xabarlar tarqaldi.
Keyinroq Reuters nashri Asad bortida bo’lgan samolyot radarlardan yo’qolgani, ehtimol, urib tushirilgan bo’lishi mumkinligini ma’lum qildi.
Rossiya Tashqi ishlar vazirligi esa Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Hozirda Asad qayerdaligi noma’lum, uning boshi uchun 10 million dollar va’da qilingan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-taroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Izoh (0)