Eron portida 7 ta harbiy kema yonib ketdi. AQSh hamda Isroil ushbu hodisani ham uyushtirgan bo‘lishi mumkinligi gumon qilinmoqda

Eron janubidagi Busher portida 15-iyul kuni portlash sodir bo‘lgan va yettita harbiy kema yonib ketgan. Hodisa oqibatida hech kim talafot ko‘rmagan, portlashni keltirib chiqargan sabablar noma’lumligicha qolmoqda, deb yozgan Reuters. Fox News nashrining qayd etishicha, Busherda Erondagi yagona atom elektrostansiyasi joylashgan.

Oxirgi haftalar davomida Eronda sanoat korxonalari va harbiy obyektlarda bir nechta shubhali hodisalar sodir bo‘lgan, inshootlarning aksariyati mamlakatning yadro bo‘yicha dasturiga bevosita aloqador.

13-iyulda mamlakat shimoli-g‘arbidagi Xuroson viloyatida tabiiy gaz ishlab chiqaruvchi obyektda portlash sodir bo‘lgan va yong‘in kelib chiqqandi.

4-iyulda Eron g‘arbidagi elektrostansiyada ham portlash va yong‘in sodir bo‘lgan, undan bir kun avval Natanzadagi uranni boyitish korxonasida yong‘in kuzatilgan.

Iyun oxirida Parchin harbiy bazasida gaz saqlanadigan obyekt portlab ketgan. Barcha holatlarda qurbonlar, jarohatlanganlar, talafot yetgan boshqa binolar haqida ma’lumot berilmagan.

Aksariyat tahlilchilar mazkur hodisalar Isroil, AQSh yoki Eronning boshqa tashqi siyosatdagi raqiblari tomonidan uyushtirilayotgan fitna deb baholanmoqda. The New York Times gazetasi razvedkadagi manbalariga tayanib Naranzadagi portlash Isroil maxsus xizmati tomonidan uyushtirilgani haqida yozgan.

Eronning AQSh bilan munosabatlari Donald Tramp mamlakat prezidentligiga saylanganidan keyin keskin yomonlashgan. AQSh Barak Obama administratsiya davrida tuzilgan yadro kelishuvidan chiqqan. Tramp Eronni kelishuv shartlarini buzganlikda ayblagan, biroq bu boradagi dalillarni taqdim etmagandi. 2020-yil yanvarida mamlakatlar o‘rtasida qurolli nizo kelib chiqishiga bir bahya qoldi, AQSh maxsus xizmati harbiylari Bag‘dodda Eron islom inqilobi muhofizlari korpusi generali Qosim Sulaymoniyni o‘ldirdi. Eron bunga javoban AQShning Iroqdagi harbiy bazasiga zarba berdi, lekin mazkur hujum oqibatida harbiy bazada hech kim halok bo‘lmagan. Raketa zarbalari berish chog‘ida Tehrondan havoga ko‘tarilgan “Ukraina xalqaro avialiniyalari” kompaniyasining Boeing 737 samolyoti xatolik sababli urib tushirilgan. Samolyot bortida bo‘lgan 176 kishi halok bo‘lgan.

Shundan so‘ng, AQSh Eronga qarshi yangi sanksiyalarni joriy qildi. Eronda esa Trampni o‘ldirish uchun 3 million dollar mukofot e’lon qilindi.

Keyinroq Eronda general Sulaymoniyning ortidan josuslik qilishda ayblangan fuqaro o‘limga hukm qilindi.

The Washington Post’ning yozishicha yaqin oylarda Eron hamda Isroil munosabatlarida keskinlashadigan ulkan voqea sodir bo‘lmagan. Ammo shu kunlarda Eron xakerlarining Isroildagi suv inshootlari tizimiga kiberhujum uyushtirgan bo‘lishi mumkinligi gumon qilinmoqda.