Turkiya mudofaa vaziri Yashar Gyuler 18-iyun kuni Eron bilan chegaradosh hududga joylashtirilgan qo‘shinlarni ko‘zdan kechirdi. Bu haqda Daily Sabah xabar berdi.
Vazir Van viloyatidagi Boshqale tumaniga tashrif buyurgan. Bu Eron va Isroil o‘rtasidagi keskinlik kuchayib borayotgan bir paytda amalga oshgan. Isroil 13-iyun kuni Eron hududiga hujum uyushtirdi, Tehron esa bu aviahujumga javob qaytardi. Vaziyat jiddiy va notinchligicha qolmoqda.
Turkiya ushbu mojaroga bir necha bor e’tibor qaratib, tomonlarni murosaga chaqirgan. Anqara, shuningdek, Eron va G‘arb davlatlari o‘rtasidagi yadroviy muzokaralarda vositachilik qilish taklifini ham ilgari surgan. Rasmiylar vaziyatni diqqat bilan kuzatib borayotganini bildirmoqda.
Ta’kidlanishicha, Tehronga qaratilgan hujumlar chog‘ida Isroil harbiy samolyotlari Turkiya havo hududiga yaqinlashgan. Turkiya bunga javoban ularni ogohlantirish uchun F-16 qiruvchi samolyotlarini havoga ko‘targan.
Eslatib o‘tamiz, Turkiya — Eron bilan uzun quruqlik chegarasiga ega davlat. Bir vaqtlar bu hudud Osiyodan kelgan muhojirlar uchun asosiy yo‘nalish bo‘lgan. Bugungi kunda esa reyslar bekor qilinganidan so‘ng, ko‘plab eronlik sayohatchilar o‘z yurtiga quruqlik orqali qaytmoqda.
Izoh (0)