Telegram messenjeridagi kanallarda Toshkent shahrining Yangihayot tumanidagi ko‘p qavatli uylarning biridagi holat ko‘rsatilib, “Bu qurilgan yangi domlar qulab tushishi mumkin”, degan iddaolar tarqaldi. Mazkur uylarni qurgan “O‘zshaharqurilish” videodagi holatga izoh berdi.
Toshkent shahri Yangihayot tumanida 2023-yilda barpo etilgan mazkur ko‘p qavatli uyda qurilish ishlari amaldagi meʼyoriy-texnik talablarga muvofiq tarzda amalga oshirilgan. Shu uyda yashovchi mulkdor tomonidan o‘zboshimchalik bilan gazobloklarni buzib, noqonuniy eshik ochish harakati amalga oshirilgan. Mazkur holat bir necha kun oldin inspeksiya xodimlari tomonidan aniqlangan. Holat yuzasidan huquqbuzar shaxsga nisbatan belgilangan tartibda qonuniy choralar ko‘rilib binodagi o‘zgartirishlarni avvalgi holatiga keltirish bo‘yicha muddatli yozma ko‘rsatma berilgan, deyiladi masʼul tashkilot axborot xizmati tarqatgan maʼlumotda.
Videolavhada aks etgan holatda mulkdor o‘zboshimchalik bilan buzish ishlarini olib borib, qurilish materiallaridan qo‘lbola usulda vaqtinchalik yopib qo‘ygan bo‘lgan. “Aslida mazkur qismni professional tarzda tiklash ishlari boshlanish arafasida bo‘lgan”, deyiladi masʼullar izohida.
Bu xonadonni o‘zim sotib olganman. 50 foiz pulini to‘lab, qolgan 50 foiz pulini kredit qilganman. Hozirgi kunda kredit to‘lab yuribman. Savdo do‘koni qilaman degan rejam bor edi, shu sabab xona eshiklarini ham olib tashlaganman. Keyin bilsam ipoteka kreditidagi uy noturarjoy bo‘lmas ekan. Shuning uchun uchun to‘xtatib qo‘yganman. Hozir mening olganimga bir yil bo‘lyapti. Bir yildan beri bu uyim bo‘sh turibdi, hech kim yashamaydi. Buni endi hozir usta olib kelib, qayta eshik qo‘yib, yashashga sharoit qilmoqchiman, deydi qurilishni o‘zboshimchalik bilan buzgan Jamshid Jo‘rayev.
Izoh (0)