Prezident Shavkat Mirziyoyev raisligida 16 iyun kuni o‘tkazilgan videoselektor yig‘ilishida aholini qiynayotgan ko‘plab dolzarb muammolar – gaz ta’minoti, tirbandlik, qurilishlar, bolalar o‘yingohlari, qabulxonalar faoliyati, yashil hududlar va boshqa masalalarda yangi tashabbuslar ilgari surildi.
Quyida, bizning fikrimizcha, odamlar kundalik hayotda to‘qnashayotgan 10 ta asosiy muammolar bo‘yicha davlat rahbari tomonidan berilgan yangi yechimlar, tashabbuslar va qat’iy vazifalar haqida qisqacha ma’lumot beramiz.
1. Yashil hududlar, bolalar maydonchalari buzilmaydi
Davlat rahbari tomonidan ko‘p qavatli uylar orasidagi o‘yingohlar, yashil hududlar qurilish uchun tadbirkorlarga berib yuborilayotgani tanqid qilindi.
Qaysi hududda “yashil” maydonlar, sport va bolalar o‘yingohlari boshqa maqsadlar uchun ajratilgan bo‘lsa, ularni aniqlab tegishli choralar ko‘rish bo‘yicha mas’ullarga ko‘rsatma berildi.
2. Tirbandliklar kamayadi, “aqlli” kamera va svetoforlar ko‘payadi
Temir yo‘l shlagbaumlari, noto‘g‘ri svetoforlar va kameralar sabab avtomobillar soatlab tirbandda qolmoqda. Kameralar faqat jarima uchun emas, harakatni boshqarish, tirbandlik va avariyani kamaytirish uchun ishlaydigan tizimga aylanadi.Chorraha, chiziq va yo‘l belgilari, svetoforlarni “aqlli” boshqaruvga o‘tkazish ishlari jadallashtiriladi.
3. Aholiga suyultirilgan gaz yetkazishdagi muammolar qisqa muddatda bartaraf qilinadi
Andijon va Surxondaryoda suyultirilgan gaz ta’minoti bilan bog‘liq muammolar keskin tanqid qilindi. Gaz bir necha haftalab yetkazib berilmayotgani ko‘rsatib o‘tildi.
Davlat rahbari aholiga suyultirilgan gazni uzluksiz yetkazib berish borasida qisqa muddatda ijobiy natijalarga erishish bo‘yicha qat’iy topshiriq berdi. Shuningdek, mutassadilarga aholini qishda gaz bilan ta’minlashda muammolar yuz bermasligi uchun hozirdan tayyorgarlik boshlash topshirildi.
4. Xalq qabulxonalari aholi muammolariga joyida yechim topadigan tizimga aylantiriladi
Xalq qabulxonalari endi murojaatni faqat boshqa idoralarga yubormaydi. Prezident bu tizim butunlay o‘zgarishi, hokimlar har kuni ish kunini Xalq qabulxonasida fuqarolar bilan muloqotdan boshlashi kerakligini bildirib o‘tdi. Hokimlar muammolarni imkon qadar keyingi kunga o‘tkazmasdan shu kunning o‘zida joyida hal qilish choralarini ko‘radi.
5. Suv va kanalizatsiyadagi muammolar tezkor hal qilinadi
Suv tarmog‘idagi avariyalar 4-5 kunga cho‘zilyapti. Sohaga ajratilayotgan mablag‘lardan unumli foydalanib kerakli materiallar oldindan tayyorlab qo‘yiladi va ta’mirlash ishlari tezlashadi. Bu sohada ham xizmat sifati yanada oshiriladi.
6. Elektr energiyasi tejaladi, aholiga “yashil ta’mir” krediti beriladi
Energiya samaradorligini oshirish uchun yangi agentlikka byudjetdan 100 milliard so‘m ajratilgan.
Endilikda, davlat xizmatchilariga energiya samarador texnologiyalarga o‘tish uchun “yashil ta’mir” kredit, subsidiya yoki ssuda beriladi.
Prezident yil yakuniga qadar kamida 100 ming xonadonni energiya samarador tizimga o‘tkazish lozimligini bildirdi.
7. Go‘sht, sut va tuxum narxining oshmasligi uchun choralar ko‘riladi
Go‘sht, sut, tuxum va parranda go‘shti narxlari oshmasligi uchun tadbirkorlarga QQSning yarmini qaytarish mexanizmi joriy qilindi.
Korxonalar “soya”dan chiqib ishlashi uchun bu tizim katta yordam beradi. Prezident ushbu mexanizm aniq, bir kunga ham kechiktirmasdan ishlashi lozimligini qayd etdi. Narxni barqaror ushlab turolmagan rahbarlarga chora ko‘riladi, lozim bo‘lsa – ishdan olinadi.
8. Soliqchilar uyma-uy yurmaydi, tushuntirishga e’tibor qaratiladi
Mahalliy soliqchilar uyma-uy yurib yer, mol-mulk va suv soliqlarini undirishga 70–80 foiz vaqtini sarflayapti. Bu holat samarasiz deb baholandi.
Endilikda soliq tizimida tushuntirish, huquqiy madaniyatni oshirishga ko‘proq e’tibor qaratiladi. Soliq to‘lash majburiyat emas, Konstitutsiyaviy burch sifatida talqin qilinadi.
Mahallada yer, mol-mulk, suv soliqlarini undirishning yangi mexanizmini ishlab chiqiladi.
9. Hokimliklarda maosh ham, mas’uliyat ham oshiriladi
Hokim, uning o‘rinbosarlari o‘z vazifalarini to‘liq bajarsa, keyingi yil hududga beriladigan mablag‘ 10-15 foiz ko‘paytiriladi.
1 avgustdan barcha viloyat va tuman hokimliklarida ish haqi oshiriladi, xodimlarga ishiga qarab oylik ustama va qo‘shimcha bonus beriladi. Lekin natija bo‘lmasa, hech kimga imtiyoz yo‘q – ishdan bo‘shatishgacha chora ko‘riladi.
10. Aholi muammolari “Xalq nazorati” elektron tizimi orqali hal qilinadi
Toshkentda sinovdan o‘tgan “Xalq nazorati” mobil platformasi endilikda barcha hududlarda ishga tushiriladi.
Fuqarolar yo‘l, infratuzilma, obodonlashtirish kabi muammolarni suratga olib, joyi va ma’lumoti bilan ilova qilib yuborishi mumkin bo‘ladi. Masalaning hal etilgani ham fotosurat orqali tasdiqlanadi. Hokimlar ishi aynan shu tizim orqali baholab boriladi.
D.Rajaboyev,
yurist, ekspert
Izoh (0)