Toshkent shahrining Shayxontohur tumanidagi ko‘pqavatli uy yerto‘lasi o‘zboshimchalik bilan o‘zgartirilgani aniqlandi. Bu haqda Uy-joy kommunal xizmat ko‘rsatish vazirligi huzuridagi Qurilish va uy-joy kommunal xo‘jaligi sohasida nazorat inspeksiyasi xabar berdi.
Qayd etilishicha, inspeksiya tomonidan aholi murojaatlariga asosan ko‘pqavatli uylarda noqonuniy qurilmalarni aniqlash va huquqbuzarlarga nisbatan tegishli choralar ko‘rish ishlari o‘tkazilmoqda.
Xususan, Shayxontohur tumani, Labzak dahasi, 1-a uyning yerto‘lasi tekshirilganda, tegishli talablarni buzgan holatda o‘zgartirilgani aniqlangan. Fuqaro loyiha hujjatlaridan chetga chiqqan holda binoning tayanch devorlari hamda kommunikatsiya tarmoqlari joylashuvini o‘zgartirgan.
Inspeksiya tomonidan huquqbuzarga nisbatan tegishli tartibda maʼmuriy bayonnoma rasmiylashtirilib, 15 kun muddatda binoni o‘z holiga qaytarish bo‘yicha topshiriq berilgan.
Avvalroq Toshkent shahri Yangihayot tumanida fuqarolar 10 qavatli uy tomiga uy qurib olgani aniqlangandi. Mazkur uyga xizmat ko‘rsatuvchi boshqaruv tashkilotlarining bir necha bor ogohlantirishlari ham mulkdorlarni ushbu fikrdan qaytarmagan. Mulkdorlarga nisbatan ma’muriy chora ko‘rilib, noqonuniy qurilmalarni 15 kun ichida bartaraf etish bo‘yicha ko‘rsatmalar berilgan.
Izoh (0)