2025-yilning 1-mart kuni Toshkent shahrining Mirzo Ulug‘bek tumanida portlatilgan xonadon sabab ko‘p qavatli uyda yashovchi aholi vakillari uysiz qoldi. Toshkent shahri hokimi hamda Mirzo Ulug‘bek tumani rahbari jabrlangan aholi vakillari bilan ko‘rishib, ular 10 kunda uyli bo‘lishini, muammo hal etilishini vaʼda qilishgandi. Biroq vaʼda vaʼdaligicha qolmoqda. Odamlar esa sarosimaga tushgan.
Qirq yildan beri Qorasuv-4 dagi xonadonda yashardim. Shu yillar davomida qo‘ni-qo‘shnilar bilan tinchgina yashaganmiz. 2025-yil 1-mart kuni qo‘shnimiz bizga maʼlum bo‘lmagan sabablarga ko‘ra uyini portlatdi. O‘zi ham portladi. Buning oqibatida 6 ta xonadon juda katta zarar ko‘rdi. Uylarimiz yashashga noloyiq deb topilib, hokimiyat tomonidan buzib tashlandi. Hozirgi paytda yettinchi qavatgacha bo‘lgan xonadonlar qoldi. Biz o‘sha kuni jarohat olib, shifoxonaga yotqizildik. Lekin qolganlarning gapirishiga qaraganda, shahar hokimi va Mirzo Ulug‘bek tumani hokimi kelishgan. 10 kun ichida hamma uylarni taʼmirlab, hamma shart-sharoitlarni yaratamiz, deb vaʼda berishgan. Shundan so‘ng 17 ta xonadon egalari mehmonxonaga ko‘chirildik. Ikki oy o‘tganidan keyin qolgan qo‘shnilarimiz uylarini qisman taʼmirlab, o‘z xonadonlariga kirib yashashmoqda. Ammo qolgan oltita xonadon egalari hozir ham mehmonxonada yashayapmiz. Rahmat davlatimizga, ovqatimizdan xabar olib turibdi. Lekin uy-joy masalasi hali ham nomaʼlum. Qachon bizga uy qilib berishadi?, deydi Dilfuza Nuraliyeva.
“Dom”dagi xonadonini portlatgan fuqaro buni oshxonadagi gaz plitasini yoqish orqali amalga oshirgan. Natijada gaz havo aralashmasi chaqnashi sodir bo‘lib, yong‘in kelib chiqqan. Shundan so‘ng ham niyatiga yetmagan fuqaro to‘qqizinchi qavatdan o‘zini tashlash orqali joniga qasd qilgan.
Hodisa sodir bo‘lgan ko‘p qavatli uyda qo‘shni xonadonlar ham zarar ko‘rgan. Mirzo Ulug‘bek tumani hokimi Bahodir G‘oyibnazarov jabrlanganlar bilan uchrashib, ular o‘z holiga tashlab qo‘yilmasligini, 10 kun muddat ichida taʼmirtalab xonadonlar taʼmirlanishini, yashashga yaroqsiz bo‘lib qolgan 6 ta xonadon egasiga boshqa xonadonlar olib berilishini vaʼda qilgan. Ammo oradan uch oy vaqt o‘tsa-da, hokim aytgan “10 kun ichida hammasi hal bo‘lishi” shunchaki gapligicha qolmoqda.
Men Mirzo Ulug‘bek tumanining Qorasuv-4 mavzesidagi ko‘p qavatli uyda yashaganman. 1-mart kuni bizda noxush hodisa ro‘y berdi. Qo‘shnimiz uyini portlatib yuborgandan keyin 8-, 9-qavatdagi xonadonlar hokimiyat tomonidan buzib tashlandi. O‘sha voqea o‘tganidan keyin 3-mart kuni Mirzo Ulug‘bek hokimi kelib, majlis o‘tkazdi. Qorasuvda ikki xonali uy narxi qancha bo‘lsa, o‘sha miqdorda kompensatsiya ajratamiz, deb vaʼda berishdi. Bir hafta, uzog‘i bilan o‘n kun ichida muammoni hal qilamiz, deyishdi. Faqat sizlarga olib beriladigan uylar har xil joylardan bo‘ladi, uy qidiringlar, deyishdi. Topdik. Uy topganimizni aytdik ham. Ammo pul masalasi haligacha hal bo‘lmadi. Hokim faqat beramiz deydi. Natija yo‘q, deydi Shahnoza Allanazarova.
Yana bir fuqaro Xayrulla Nuraliyev o‘sha kungi voqea guvohi bo‘lganini aytmoqda.
O‘sha kuni soat 15:30 lar edi. Pastda shovqin eshitdim. Chiqsam “uchastkovoy” va FVV xodimi turibdi. Uch kishi temir eshikni ochishga harakat qilayotganini ko‘rdim. Men “uchastkovoy”ni chaqirdim, Andrey degan qo‘shnim uyini qulflab olgan ekan. Qo‘shnimni chaqirib, “chiq, gapim bor”, dedim. Senda gapim yo‘q, dedi menga. Shu paytda eshik orasidan gazning hidi kelayotganini sezdim. “Uchastkovoy”ga “gaz chiqyapti, boshqa chorasini ko‘ringlar”, dedim. Shundan keyin ular temir eshikni teshib ochishdi. Lekin ichkarida ikkinchi qavat eshigi bor edi. Ikkinchi qavat eshigining ikkita qulfi borligi uchun uni ocholmadik. Keyin FVV xodimi eshikni tepishni boshladi. “To‘xtang, tepmang” dedim. Qo‘shnim eshigini mixlay boshladi. “Balkondan tushinglar, oynasi yo‘q”, dedim. O‘sha payt gaz portladi. Men zinadan dumalab ketdim. MCHS xodimining yuzi kuydi. Menimcha ko‘zi ko‘r bo‘lib qoldi. Operatsiya bo‘ldi deb eshitdim. “Uchastkovoy”ning yuzi kuyib ketdi. Mana, o‘sha voqeadan keyin uch oyga yaqin muddat o‘tdi. Hech qanday yangilik yo‘q. Faqat vaʼda berishadi, uy berishmayapti, deydi Xayrulla Nuraliyev.
“Daryo” aholi vakillarining eʼtirozidan kelib chiqib, Mirzo Ulug‘bek tumani hokimligi axborot xizmati rahbari bilan bog‘lanib, odamlarni qiynayotgan savollarga javob topishga urindi. Hokimlik axborot xizmati masʼuli Maʼmur Parmonov jurnalistni qiziqtirayotgan savollarga tez orada javob berishini aytsa-da, javob berish muddati kelganda shunchaki sukut saqlashni lozim topdi.
Tuman hokimligi axborot xizmati rahbari ochiq qoldirgan savollarga javob berishga uringan Toshkent shahar hokimligi axborot xizmati rahbari Gulnoza Qosimova aholiga uy sotib olish uchun mo‘ljallangan mablag‘ Toshkent shahar hokimligi tomonidan moliyalashtirilishini, moliyalashtirish ishlari boshlanganini, mablag‘ bo‘lishini kutishayotganini aytdi.
Kecha qurilish bo‘limi bilan gaplashgandim, tez kunda bo‘lib qoladi, deyishdi. Hujjatlar tayyor. Anig‘ini biz ham bilmaymiz, pul kutyapmiz, deyishdi. Lekin bu yerda kimdir ishni cho‘zganidan yoki loqaydligidan emas, aynan shu mablag‘ tushishi kerakligi sabab cho‘zilmoqda. Tez orada bo‘ladi, deyishdi, deydi hokimlik axborot xizmati rahbari.
Izoh (0)