Toshkent shahrining Sergeli tumanidagi “Junariq” mahallasida joylashgan ko‘p qavatli uylarda yashovchi 1500 dan ortiq xonadon vakillariga ishga borib-kelish, shuningdek, shahar markaziga chiqish uchun yo‘l kerak. Bori ham Yangihayot hokimligi tomonidan kovlab, buzib tashlandi. Bu haqda “Daryo”ga murojaat qilgan aholi vakillari gapirib berdi.
Mana shu uylarda yashaymiz. Yagona yo‘limizni ham qazib tashlashdi. Mashina bilan uyga o‘tolmayapmiz. O‘zi bitta shu ko‘cha bor edi. Bu uylarda mingdan ortiq xonadon bor. Yo‘lni qazib qo‘yishgani uchun mashinamizni besh yuz metr yoki bir kilometr uzoqqa tashlab, yomg‘irli kunlarda ham piyoda uyga kirishga majburmiz. Metroning tagida yo‘l bor, faqat loy, yurib bo‘lmaydi. Asfalt qilib berishsa, kirib-chiqishda muammo bo‘lmasdi. Bu yerda yo‘l muammosi shu uylar qurilganidan beri bor. Ko‘p qavatli uylarda yashovchi aholi har doim bir tomonlama yo‘ldan, tirbandlikda yurishga majbur. Mashinalarning bu holatda yurishi yo‘l yuzida yashovchi odamlarga ham noqulaylik tug‘dirmoqda. Ikkinchi yo‘l ham bor, ammo u yerga shlagbaum o‘rnatib yopib qo‘yishgan, deydi Hasan Xo‘janazarov.
Ko‘p qavatli uylarda yashovchi Sirojiddin Hamroyevning aytishicha, yo‘l muammosini hal qilishini aytgan hokimlik aholiga olti oydan beri vaʼda beradi. Ammo natija yo‘q.
Shu uylarni qurib sotgan qurilish tashkiloti BM Group yo‘l ham qurib beramiz degandi. Lekin qurib bermadi, uyni qurdi va ketdi. Bolalarimiz maktab yoki bog‘chaga loy kechib boryapti. Yo‘l yo‘qligi, bori ham mana shunaqa qilib yopib qo‘yilgani uchun uyimizga kirolmaymiz. Muammo yuzasidan mahallaga chiqsak hokimiyatga boramiz deydi, hokimiyatga boramiz desak, mana bu tomoni Sergeli bo‘lsa, bu tomoni Yangihayot. O‘rtada yo‘l yo‘q, odamlar sarson, deydi Sirojiddin Hamroyev.
Aholi vakillaridan yana biri Humoyun Ergashevning “Daryo”ga bildirishicha, 22-yanvar kuni hududga Sergeli hamda Yangihayot tumani hokimlari va masʼullar kelib, aholining yo‘l muammosiga yechim izlagan.
Shu yerdan metroning ikkinchi bekatigacha yo‘l ochilishi kerak edi. Yo‘lda avariya holatidagi loy ko‘prik bor. Bizlar deputatimiz bilan mahalla Kengashlariga murojaat qilgandik. Kecha Sergeli hamda Yangihayot tumani hokimlari kelibdi. Ular shu yerdan yo‘l ochilishiga, yo‘lning taʼmirlanishiga ruxsat berib ketishibdi, deydi u.
Humoyun Ergashev, shuningdek, ko‘p qavatli uylarda yashovchi odamlarning taʼkidlashicha, xususiy klinika yonidagi shlagbaum ham yopib qo‘yilgan bo‘lib, ko‘p qavatli uylarda yashovchi aholining kirib-chiqishi muammoga aylangan.
Yangihayot hokimligi masʼullari yo‘lni kavlab qo‘yishganiga rasmiy izoh bersa kerak. Nega kovlashganidan aynan mening xabarim yo‘q. Lekin kavlashibdi. Buning sababini o‘zlari aytishar. Bu ko‘chadan chiqib ketadigan yo‘lda esa ikkita shlagbaum qo‘yilgan. Birinchisi ochilgan, ikkinchisi yopiq turibdi. Yopiq qo‘yilishining sababini men aniq bilmayman. Aytishlariga qaraganda u yoqdagi ko‘prik ham avtomobil o‘tib-qaytishi uchun nosoz holatda ekan. Qandaydir texnik nosozlik sababli yopishgan ekan. Bizlar mas’ullardan izoh kutyapmiz. Asosiy yo‘limiz tez kunlarda bitib qolsa, xalqimizga ancha yaxshi bo‘lardi, deydi Humoyun Ergashev.
Yana bir suhbatdosh esa ko‘p qavatli uylarda yashovchi aholining yo‘li kavlab, yopib qo‘yilgani uchun odamlar mashinada xususiy klinika tomondan, shlagbaumdan pul berib o‘tishga majbur bo‘lmoqda.
Odamlarga zulum bo‘lmasligi kerak-da. Yo‘lni yopishgach, mashinamizni uyimizdan uzoqqa qo‘yishga majbur bo‘lyapmiz. Kechasi ballonini yechib ketishsa, kimga zarar, bizga zarar. O‘tgan kuni tanishim xususiy klinika tomondagi shlagbaumdan pul berib o‘tibdi. Pul bersa o‘tkazib yuboryapti, bo‘lmasa shlagbaumni yopib qo‘yishgan, deydi u.
Murojaatchilarning aytishicha, ikki hokimlik o‘rtasidagi kelishmovchilik aholiga muammo tug‘dirmoqda.
Kecha bu yerga ikkita tuman — Sergeli va Yangihayot tumanlari hokimliklaridan xodimlar kelishdi. Ular o‘zaro janjallashishdi. Aytishlaricha metroning aynan shu qismi ikki tuman hududini ajratuvchi chegara ekan. Post emish. Bu yangi uylarda yashovchilar o‘zlarining yo‘lini topib, yurishlari kerak ekan. Bunaqa “ishkal” oldin ham bo‘lgan. Oldin beton to‘siq qo‘yishgan, keyin uni odamlarning shikoyatidan so‘ng, olib tashlashgan. Bu ko‘p qavatli uyda yashovchilar uchun aslida uchta yo‘l bor. Bitta yo‘limiz mana Yangihayot hokimligi tomonidan yopib qo‘yilgani bo‘lsa, yana biri “ShohMed” xususiy klinikasi oldidagi yo‘l. U yo‘l ham shlagbaum bilan yopilgan. Uchinchi yo‘l esa o‘sha siz ko‘rgan, maktab bolalari qo‘rqib o‘tib-qaytuvchi omonat ko‘prik ustidagi yo‘l. U yo‘ldan mashinada yurish qiyin. Judayam qo‘rqinchli yo‘l u, deydi murojaatchi Lochin Ergashev.
Fuqaro Toshkent shahar hokimi Shavkat Umurzoqovga murojaat qilib, ikki tuman — Sergeli va Yangihayot hokimliklari masʼullarining yer bilan bog‘liq kelishmovchiligi sabab odamlar aziyat chekayotganini aytib, fuqarolari holidan xabar olishini, muammoni yechishda ko‘mak berishini so‘radi.
Mayli, mana shu ikkita kichkina hokimiyat hech narsani hal qila olmas ekan. Biz xuddi bu yerda begonadek bo‘lib, qolyapmiz. Bu yerda mingdan ortiq xonadon shunchaki o‘z uyiga kirib chiqolmay o‘tiradimi? Bularning tirikchiligi nima bo‘ladi? Uyini remont qilishi kerak. Qaysi biri mashinada o‘tadi? Bola-chaqasi bor, nogironi bor, qariyasi bor, mashinada o‘tishga muhtoj bo‘lgan fuqarolari bor. Bu shunchaki odamlarning ustidan kulishmi? Ikkita hokimlik masʼuliyatni bir-biriga ag‘darmoqda. Unday bo‘lsa teparoqdan shahar hokimi kelsin. Shavkat aka Umrzoqovmi? O‘sha kishi kelsin. Vaziyatga baho bersin. Ko‘rsangiz bu yerni Toshkent shahri deb o‘ylamaysiz. O‘zbekiston poytaxtining ahvoli shumi?, deydi Lochin Ergashev.
Lochin Ergashevning aytishicha, u xususiy klinika egasining yo‘lni yopib olgani bilan bog‘liq muammo haqida Prezident portaliga shikoyat qilgan. Ammo yechim topilmagan.
Bu muammo haqida shaxsan ikki marta portalga yozganman. Ichki ishlarga birinchi qo‘ng‘iroq qilganimda, mahalla “uchastkavoyi” ilojimiz yo‘q degan. Portalga yozildi qayta-qayta. Hamma narsa portalda hal bo‘lgan, lekin bu yoqdagi hal bo‘lmayapti, chunki “ShohMed” masalasi bo‘lgani uchun. Kelgan mas’ul xodimlar “aka, mana bunaqa deb quloqqa shivirlab, bu yerda mana shunaqa odam yashaydi”, deb ketishadi, deydi u.
Yangihayot hokimligi aholi eʼtirozi va odamlarning yo‘lni hokimlikka tegishli texnikalar buzgani haqidagi ayblovlariga javob berar ekan qazish ishlari hududda kommunikatsiya tarmoqlaridagi taʼmirlash ishlari olib borilishi bilan bog‘liqligini tushuntirdi.
Uy-joy, kommunal xizmat ko‘rsatish bo‘limi bosh mutaxassisi Abdulatif Vahobovning maʼlum qilishicha, mazkur hududda kommunikatsiya tarmoqlarida taʼmirlash ishlari olib borilayotgani sababli yo‘ldan foydalanish vaqtinchalik cheklangan, deydi hokimlik axborot xizmati rahbari.
Izoh (0)