O‘zbekistonda tez orada oliy o‘quv yurtlariga qabul imtihonlari boshlanadi, sentabr oyidan Toshkent shahri yana 100 minglab talabalar bilan to‘ladi. Tabiiyki, ularni yotoqxonalar bilan ta’minlash masalasi yana kun tartibiga ko‘tarilmoqda. Avvalgi yillarda bu yo‘nalishdagi ishlar yaxshi yo‘lga qo‘yilmagani sababli xaos yuzaga kelib, ko‘plab o‘quvchilar boshpanasiz qolishiga to‘g‘ri kelgandi. Oliy ta’lim, fan va innovatsiyalar vazirligi bundan to‘g‘ri xulosa chiqardimi? Umuman, Toshkent shahri viloyatlik talabalarni qabul qilib olishga qanchalik tayyor? Vazirlik matbuot xizmati rahbari Nazokat Abduqunduzova “Daryo”ga shu haqda ma’lumot beradi.
Ayni paytda qancha turarjoyga ehtiyoj bor?
Toshkent shahrida talabalar sonining yildan yilga ortib borishi fonida Oliy ta’lim, fan va innovatsiyalar vazirligi tomonidan joriy yilda bu muammoni hal etish maqsadida bir qator amaliy ishlar qilinmoqda. Jumladan, yangi yotoqxonalarni qurish, ta’mirlash uchun zarur mablag‘lar ajratilgan va bugungi kunda 38 ming o‘rinli 83 ta talabalar turarjoylarini barpo etish bo‘yicha loyihalar amalga oshirilmoqda.
Xususan, davlat-xususiy sheriklik asosida 23 ming 494 o‘rinli 50 ta, oliygoh va budjet mablag‘lari, oliygohlarning to‘liq o‘z mablag‘lari hamda investitsiya dasturi doirasida 10 ming 660 o‘rinli 21 ta talabalar turarjoylari qurilishi uchun zarur mablag‘lar ajratilgan. 2023-yil yakuniga qadar respublika bo‘yicha 18 ming o‘rinli talabalar turarjoylarini foydalanishga topshirish vazifasi belgilangan.
Hozir necha o‘rinli yotoqxonalar mavjud?
2023-yil 1-iyul holatiga ko‘ra, 4 ming 702 o‘rinli 12 ta talabalar turarjoylari foydalanishga topshirilgan. Ayni paytda 24 ming 394 o‘rinli 51 ta talabalar turarjoylari qurilishi davom etmoqda. Joriy yilning sentabr oyi, ya’ni yangi o‘quv yili boshlanishiga qadar respublika bo‘yicha jami 6 ming 400 o‘rinli 11 ta talabalar turarjoylari foydalanishga topshiriladi.
Jumladan, Toshkent shahridagi Talabalar shaharchasi hududida jami 3 ta 1 800 o‘rinli talabalar turarjoylarida qurilish, ta’mirlash ishlari to‘liq yakunlanib, foydalanishga topshiriladi:
- O‘zbekiston milliy universiteti uchun 400 o‘rinli;
- Toshkent davlat texnika universiteti uchun 600 o‘rinli;
- Toshkent tibbiyot akademiyasi uchun 800 o‘rinli.
Yil yakuniga qadar davlat dasturida belgilangan 18 ming o‘rinli talabalar turarjoylari ham to‘liq qurib bitkaziladi.
Talabalar turarjoylari qanday taqsimlanadi?
Har yili sentabr oyining birinchi o‘n kunligida talabalar turarjoylarini tarqatish, taqsimlash jarayonida navbatlar hosil bo‘lishi kuzatiladi. Bu yil ushbu holatning oldini olish maqsadida belgilangan tartib va mezonlarga muvofiq yuqori kurs talabalariga yotoqxonalar oldindan taqsimlandi. Bunda 1-bosqich talabalariga TTJdagi o‘rinlarning 60 foizi saqlab qolinadi.
Shu tartibda barcha kurslar bilan qo‘shib hisoblaganda Toshkent shahrida 42 ming 300 nafar yoki 27 foiz talabalar mavjud 100 ta talabalar turarjoylariga joylashtiriladi.
Talabalarning ijara uylarda turish tartibi qanday bo‘ladi?
Hozirgi kunda 48 ming 976 nafar talabalar (30 foiz) turarjoyga muhtoj bo‘lib, ular ijara shartlari asosida xususiy xonadonlarda yashashiga to‘g‘ri keladi. Tyutorlar nazoratida 23 ming 774 nafar talabalar (2, 3, 4-kurslar) Toshkent shahrida ijara xonadonga joylashgan. Ya’ni ularning aksariyati avvaldan yashab kelayotgan ijara uylarini saqlab qolishgan yoki oldindan ijara uylarini band qilib qo‘yishgan.
Shu holatda ijara xonadonlariga joylashishga muhtoj bo‘lgan (yotoqxonadan joy berilmagan, o‘z uyi, yaqin qarindoshi mavjud bo‘lmagan va ijara xonadoni ham aniq bo‘lmagan) talabalar 25 ming 202 nafarni tashkil etmoqda. Ana shu tahlillardan kelib chiqib, oliy ta’lim muassasalarida barcha tyutorlarni to‘liq jalb qilgan holda mahalla raislari bilan hamkorlikda bo‘sh turgan ijara xonadonlarini topish ishlari amalga oshirilgan.
Uy egalari bilan birma-bir suhbatdan keyin jami 8 ming 438 ta ijara xonadonlarining manzilli ro‘yxati shakllantirilgan. Hisob-kitoblarga ko‘ra, mazkur xonadonlarga 24 ming 254 nafar talabani joylashtirish imkoni mavjud.
Ayni paytda qolgan 948 nafar talabaga qo‘shimcha ijara uylarini topish ishlari davom etmoqda. Bo‘sh turgan ijara xonadonlari to‘g‘risidagi manzilli ro‘yxat barcha talabalarga yetkazilmoqda.
Ijara xonadonlariga joylashgan talabalarga ijara to‘lovining bir qismini qoplab berish ishlari amaldagi tartib asosida davom ettiriladi.
Shu tartibda yangi o‘quv yilida talabalarni ta’mirlangan va bo‘sh turgan ijara xonadonlariga joylashtirish ishlari tashkil etiladi va kirish imtihonlari yakunlanishi bilan, ya’ni 20-avgust kuni talabalar qayerda yashashi mumkinligi haqida aniq ma’lumotga ega bo‘lishi ta’minlanadi.
Joriy yilning 25-avgustiga qadar talabalarni yotoqxona bilan ta’minlash jarayonini to‘liq yakunlash ko‘zda tutilmoqda va bu borada kunlik monitoring yo‘lga qo‘yilgan.
Talabalar Toshkent Indeks majmuasidan bu yil ham foydalanadimi?
2022/2023-o‘quv yilida Toshkent shahar hokimligi tomonidan Yangihayot tumanidagi “Indeks” savdo majmuasida tashkil etilgan vaqtinchalik yotoq joylarida talabalar uchun zarur shart-sharoitlar mavjud emasligi sababli joriy o‘quv yilida bu variantdan foydalanish ko‘zda tutilmagan.
Yotoqxonalar hisobini yuritish reyestri ishga tushadimi?
Shuningdek, talabalarni turarjoyga onlayn joylashtirish imkoniyatini beruvchi axborot tizimi ham ishlab chiqilmoqda. Mazkur axborot tizimida oliy ta’lim muassasalarining yotoqxonalar hisobini yuritish reyestri shakllantirilib, oliy ta’lim muassasasi tomonidan har bir talabalar turarjoyining manzili va quvvati, talabalar turarjoyida kurslar hamda fakultetlarga ajratilgan o‘rinlar soni muntazam kiritib boriladi.
Izoh (0)