Yaponiyaning Serendix nomli startapi atigi ikki kun ichida tayyor bo‘ladigan zamonaviy uylarni taklif taklif qilmoqda. Bunday turar joyni qurishda ulkan 3D-printerlar qo‘llanadi.
Kompaniya ma’lumotlariga ko‘ra, umumiy maydoni 49 kvadrat metr bo‘lgan uy 44,5 soatda qurib bitkaziladi. E’tiborli jihati, bu hisobga yer tayyorlash va kommunikatsiyalarni ulash ishlari kiritilmagan.
Bunday “tez quriladigan” uyning narxi 37 ming AQSH dollariga teng. Bu narx Yaponiyadagi ayrim mintaqalarda ikki xonali kvartira yoki zamonaviy xorijiy yengil avtomobil narxiga teng keladi.
Uyning ichki rejalashtiruvi quyidagicha:
- Yotoqxona;
- Xonadon egasining tanloviga qarab — ish xonasi yoki bolalar xonasi;
- Hammom va hojatxona birlashtirilgan holda;
- Oshxona va mehmonxona yagona ochiq maydonda.
Alohida qulaylik sifatida, barcha muhandislik kommunikatsiyalari (elektr, suv, isitish, kanalizatsiya) mijoz xohishiga ko‘ra ulanadi. Elektr ta’minoti uchun esa quyosh panellaridan foydalanish imkoniyati mavjud.
Uyning barcha qismi to‘liq 3D-printerda chop etilmaydi. Uning har bir konstruktiv qismi — devor, shift, tayanch bloklar alohida-alohida 3D-printer orqali chiqariladi. So‘ng bu bloklar qurilish maydonchasida montaj qilinadi. Ba’zilar bu uslubni “yaponcha panel uylari” deb atamoqda. Jarayonning qanday kechishi haqida Serendix kompaniyasi maxsus video ham e’lon qilgan.
Startap mualliflari bu texnologiya, eng avvalo, uy-joyga ehtiyoji katta, daromadi past bo‘lgan qatlamlar uchun xizmat qilishini ta’kidlamoqda. Ularning fikricha, arzon va tez quriladigan uylar uy-joy masalasini sezilarli darajada yengillashtiradi.
Shunga qaramay, Yaponiya bilan bog‘liq ayrim muammolar mavjud. Ekspertlar ta’kidlaganidek, mamlakatda yer juda qimmat, aholining zichligi yuqori va mavjud bo‘sh maydonlar soni cheklangan. Yer narxi esa ba’zida ko‘p xonali kvartira bilan teng keladi. Bunday holatda arzon uyning amaliy foydasi kam bo‘lishi mumkin.
Mutaxassislarning fikricha, yapon texnologiyasi aholisi zich joylashmagan, lekin katta yer maydonlariga ega, iqtisodiyoti rivojlanayotgan davlatlar uchun ayni muddao bo‘lishi mumkin. Bunday mamlakatlar endigina urbanizatsiya jarayoniga kirib bormoqda va Serendix loyihasi bu jarayonni tezlashtirishi mumkin.
Izoh (0)