Telegram мессенжеридаги каналларда Тошкент шаҳрининг Янгиҳаёт туманидаги кўп қаватли уйларнинг биридаги ҳолат кўрсатилиб, “Бу қурилган янги домлар қулаб тушиши мумкин”, деган иддаолар тарқалди. Мазкур уйларни қурган “Ўзшаҳарқурилиш” видеодаги ҳолатга изоҳ берди.
Тошкент шаҳри Янгиҳаёт туманида 2023 йилда барпо этилган мазкур кўп қаватли уйда қурилиш ишлари амалдаги меъёрий-техник талабларга мувофиқ тарзда амалга оширилган. Шу уйда яшовчи мулкдор томонидан ўзбошимчалик билан газоблокларни бузиб, ноқонуний эшик очиш ҳаракати амалга оширилган. Мазкур ҳолат бир неча кун олдин инспекция ходимлари томонидан аниқланган. Ҳолат юзасидан ҳуқуқбузар шахсга нисбатан белгиланган тартибда қонуний чоралар кўрилиб бинодаги ўзгартиришларни аввалги ҳолатига келтириш бўйича муддатли ёзма кўрсатма берилган, дейилади масъул ташкилот ахборот хизмати тарқатган маълумотда.
Видеолавҳада акс этган ҳолатда мулкдор ўзбошимчалик билан бузиш ишларини олиб бориб, қурилиш материалларидан қўлбола усулда вақтинчалик ёпиб қўйган бўлган. “Аслида мазкур қисмни профессионал тарзда тиклаш ишлари бошланиш арафасида бўлган”, дейилади масъуллар изоҳида.
Бу хонадонни ўзим сотиб олганман. 50 фоиз пулини тўлаб, қолган 50 фоиз пулини кредит қилганман. Ҳозирги кунда кредит тўлаб юрибман. Савдо дўкони қиламан деган режам бор эди, шу сабаб хона эшикларини ҳам олиб ташлаганман. Кейин билсам ипотека кредитидаги уй нотураржой бўлмас экан. Шунинг учун учун тўхтатиб қўйганман. Ҳозир менинг олганимга бир йил бўляпти. Бир йилдан бери бу уйим бўш турибди, ҳеч ким яшамайди. Буни энди ҳозир уста олиб келиб, қайта эшик қўйиб, яшашга шароит қилмоқчиман, дейди қурилишни ўзбошимчалик билан бузган Жамшид Жўраев.
Изоҳ (0)